Ունենք երկու ճանապարհ. եթե Ադրբեջանի մտահոգություններն անկեղծ են, թե Հայաստանի Սահմանադրությունն ունի տարածքային պահանջներ Ադրբեջանից, այս դեպքում այդ մտահոգությունների ամենաուղիղ ճանապարհը խաղաղության պայմանագրի ստարագրումն է, ոչ թե չստորագրումը, այսօր Երևանում ֆրանսիացի գործընկերոջ հետ համատեղ մամուլի ասուլիսի ժամանակ այս մասին ասաց ՀՀ արտաքին գործերի նախարար Արարատ Միրզոյանը։
«Այս պայմանագիրը ստորագրումից հետո մեր օրենսդրության պահանջների համաձայն պետք է անցնի վավերացման գործընթաց։ Առաջին հերթին պետք է դիմենք Սահմանադրական դատարան, որը աշխարհում գոյություն ունեցող միակ մարմինն է, որն իրավասություն ունի մեկնաբանելու մեր Սահմանադրությունը»,-ասաց Միրզոյանը։
Նա նշեց, թե Հայաստանը Ադրբեջանին պետք է ներկայացնի իր փաստարկները, լսի ադրբեջանական կողմին և փորձի լուծում գտնել։
«Մեր առաքելությունն է փորձել լուծում գտնել։ Եթե կարողանանք պայմանավորվածություններ ձեռք բերել առաջիկայում նախարարական մակարդակով կամ վարչապետի և նախագահի մակարդակով նոր հանդիպումների, դա ողջունելի է, և կողմ ենք այդպիսի հանդիպումներին»,- ամփոփեց Միրզոյանը։
