Ադրբեջանի ճնշումներից հետո «հայոց ցեղասպանությունը» ճանաչելու հարցը հանվել է Իսրայելի Քնեսեթի օրակարգից. Հաջիև
Իսրայելի կողմից 1915 թվականի իրադարձությունները որպես «հայոց ցեղասպանություն» ճանաչելու հարցը լուրջ մտահոգություն է առաջացրել Ադրբեջանում։ Քանի որ եղբայրական Թուրքիայի շահերը միշտ էլ առաջնահերթ են եղել Ադրբեջանի համար, այս հարցը միշտ էլ կարմիր գիծ է եղել մեզ համար. Haber Global հեռուստաալիքին տված մեկնաբանության մեջ հայտարարել է Ադրբեջանի նախագահի օգնական Հիքմեթ Հաջիևը։
«Հենց որ այս հարցը ծագեց, Ադրբեջանը, նախագահի հանձնարարությամբ, սկսեց ակտիվ դիվանագիտական ջանքեր ներդնել: Մենք մեր դիրքորոշումը փոխանցեցինք իսրայելական կողմին. նման որոշումը, առաջին հերթին, անարդար կլինի, չի արտացոլի պատմական իրականությունը, և մենք այն անընդունելի ենք համարում: Դրական կողմն այն է, որ իսրայելական կողմը լուրջ ընդունեց Ադրբեջանի ուղերձները: Մենք կարծում ենք, որ այս հարցում հետագա առաջընթացը կանխվել է: Մեր կարծիքով, նման քայլը ոչ մի կերպ չի արտացոլի պատմական իրականությունը և լիովին անարդար կլինի», – հայտարարել է Հիքմեթ Հաջիևը:
Նա նշել է, որ Ադրբեջանը ներկա է սեղանի շուրջ, որտեղ Թուրքիան չկա, և Թուրքիան ներկա է սեղանի շուրջ, որտեղ Ադրբեջանը չկա։
«Մենք վճռականորեն արձագանքում ենք մեր երկրների շահերի դեմ ձեռնարկված յուրաքանչյուր քայլի», – հավելեց Հիքմեթ Հաջիևը։
Նշենք, որ Իսրայելի կառավարությունը կասեցրել է 1915 թվականի իրադարձությունները որպես Հայոց ցեղասպանություն ճանաչելու իր նախաձեռնությունը։
«Ադրբեջանի ճնշումներից հետո «հայոց ցեղասպանությունը» ճանաչելու հարցը հանվել է Իսրայելի Քնեսեթի օրակարգից»,- գրել է ադրբեջանական APA-ն։
