ԱԱԾ–ի դիմակավորված և զինված անձինք վաղ առավոտից` առավոտյան ժամը 7-ից, արգելափակել են Գագիկ Ծառուկյանի տան մուտքը. փաստաբանները մեկ ժամ սպասելուց հետո նոր միայն կարողացել են մուտք գործել և մասնակցել խուզարկության գործընթացին։ Այս մասին այսօր Գագիկ Ծառուկյանի առանձնտան դիմաց լրագրողների հետ զրույցում նշեց ԲՀԿ նախագահի մամուլի խոսնակ Իվետա Տոնոյանը։
«Այս պահին «Մուլտիգրուպ» կոնցերնի գրեթե բոլոր ձեռնարկություններում լայնածավալ խուզարկություններ են իրականացվում, ինչպես նաև խուզարկություններ են իրականացվում այդ ընկերությունների տնօրենների բնակարաններում։ Մեկ տասնյակից ավել ընկերությունների մասին է խոսքը՝ «Արարատցեմենտ», Երևանի Արարատ կոնյակի օղու գործարան, «Մուլտի վելնես» համալիր, Օլիմպավան, «Մուլտի ստոուն» ընկերություն, «Մուլտի գրանդ» հյուրանոցային համալիր և բազմաթիվ այլ հիմնարկներում։ Այս պահին միգուցե ամբողջ ցանկը չհիշեմ։
Այս լայնածավալ գործողությունները վկայում են ընդհանուր ընդհանուր առմամբ մեկ բանի մասին, որ բոլոր հնարավոր և անհնարին միջոցներով փորձում են ճնշում գործադրել Գագիկ Ծառուկյանի վրա։ Սպասեցին և համբերեցին Սահմանադրական դատարանի որոշմանը, որից անմիջապես հետո՝ այսօր վաղ առավոտյան, սկսել են գործողությունները։
Մինչև ամսի 4-ը, երբ պարոն Ծառուկյանին անձեռնմխելիությունից զրկելու մասով ԿԸՀ-ն ստացել էր միջնորդություն, բայց չքննեց այդ հարցը՝ ըստ երևույթին կանխազգալով կամ հստակ իմանալով, թե ինչ որոշում է ՍԴ-ն կայացնելու, և որ ամսի 4-ից հետո այլևս պարոն Ծառուկյանը, որպես պատգամավորության թեկնածու, չի ունենալու անձեռնմխելիություն, և այլևս հարկ չի լինելու ԿԸՀ-ում այդ հարցը քննարկել»,-ասաց նա։
Իվետա Տոնոյանը միաժամանակ շեշտեց, որ տեղյակ չեն՝ ինչ վարույթի շրջանակներում են իրականացվում խուզարկությունները։
«Մենք ևս մամուլից ենք տեղեկացել, որ խոսքը փողերի լվացում, հարկերից խուսափում հոդվածների մասին է, բայց Քննչական կոմիտեն հարկ չի համարում առ այս պահը որևէ պաշտոնական պարզաբանում տալ»,- ասաց նա՝ նշելով, որ Գագիկ Ծառուկյանը, նրա մայրը՝ Ռոզա Ծառուկյանը, ընտանիքի մյուս անդամները այս պահին տանն են գտնվում։
Հիշեցնենք, այսօր վառ առավոտվանից խուզարկություն է իրականացվում Գագիկ Ծառուկյանի տանը։ ԲՀԿ անդամ Արման Աբովյանն ավելի վաղ հայտնել էր, որ Գագիկ Ծառուկյանի տունը շրջապատված էհամազգեստով, ավտոմատավորներով զինված մարդկանցով։ ։
ՔԿ-ից էլ հայտնել էին, որ քրեական վարույթի շրջանակում կատարվում են անհրաժեշտ քննչական և վարութային գործողություններ, ավելի ուշ հանդես կգան պաշտոնական հաղորդագրությամբ։
