Ինչպես արդեն հայտնել ենք ՀՀ վարչապետ Նիկոլ Փաշինյանը հունիսի 20-ին արտահերթ խորհրդարանական ընտրություններ անցկացնելու որոշումը կյանքի կոչելու համար այսօր հրաժարական է ներկայացրել։ Նա կշարունակի կատարել ՀՀ վարչապետի պարտականությունները օրենսդրությամբ ու սահմնադրությամբ սահմանված ամբողջ ծավալով:
ՀՀ սահմանադրության 149-րդ հոդվածի 2-րդ կետի համաձայն՝ վարչապետի հրաժարական ներկայացնելու կամ վարչապետի պաշտոնը թափուր մնալու այլ դեպքերում Կառավարության հրաժարականն ընդունվելուց հետո` յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ:
Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:
Ստացվում է, որ Ազգային ժողովը կարող է արձակվել Փաշինյանի հրաժարականից 2 շաբաթ անց:
ՀՀ Սահմանադրության 92-րդ հոդվածի 2-րդ կետի համաձայն՝ Ազգային ժողովի արտահերթ ընտրությունն անցկացվում է Ազգային ժողովի արձակվելուց ոչ շուտ, քան 30, եւ ոչ ուշ, քան 45 օր հետո:
ArmDaily.am-ի հետ զրույցում ՍԴ աշխատակազմի նախկին ղեկավար Էդգար Ղազարյանն ասաց, որ Նիկոլ Փաշինյանը չի կարող վարչապետի պաշտոնակատար լինել, քանի որ ինքը հրաժարական է տվել և դա ընդունվել է։ Պարտականությունները կատարում են կառավարության մյուս՝ հրաժարական չտված անդամները։
«Մինչև Ազգային ժողովի կողմից նոր վարչապետի ընտրությունը ՝ ՀՀ կառավարությունն այսօր պետք է հրավիրի արտահերթ նիստ և որոշում կայացնի վարչապետի պարտականությունների ժամանակավոր կատարումը կառավարության անդամներից որևէ մեկի վրա դնելու մասին։ Մինչ այդ՝ քանի որ Փաշինյանն այլևս ՀՀ նախկին վարչապետ է՝ նա պետք է լքի աշխատասենյակը, ամառանոցը, ծառայողական մեքենան, քանի որ այլևս պետական պահպանության օբյեկտ չի կարող լինել»։
Հիշեցնենք, որ խորհրդարանական արտահերթ ընտրությունների քարոզարշավի տևողությունը 12 օր է:
