Երկար ժամանակ աշխատում էինք հանրային ծառայությունները կարգավորող հանձնաժողովի հետ, և մարդիկ կասկածներ էին հայտնում, թե ինչքանով են հիմնավորված, որ էականորեն բարձրացել են էլեկտրաէներգիայի գները, ՀԷՑ-ի ժամանակավոր կառավարիչ Ռոմանոս Պետրոսյանի հետ աշխատանքային հանդիպման ժամանակ այսօր նշեց վարչապետ Նիկոլ Փաշինյանը։
Նա նկատեց՝ պատճառաբանվում էր, որ գների բարձրացումը կապ ունի մեծ տեմպով ընթացող շինարարությունների և նոր բաժանորդների մեծ հոսքի հետ:
«Շատ կարևոր է, որ ինքը հիմնավորվածից պակաս էլ չլինի, ավելի էլ չլինի: Օրինակ՝ շատ երկրներում տեսել եմ, որ քաղաքական ճգնաժամերից խուսափելու համար՝ էլեկտրաէներգիայի գներն անընդհատ իջեցրել են, արդյունքում համակարգերը եկել, հասել են այն իրավիճակին, որ կոլապսի առաջ են կանգնել։
Մեր քաղաքացիներին պետք է ներկայացնենք, որ հոսանքի գինը պետք է լինի էֆեկտիվ՝ այն աստիճանի, որ համակարգի բնականոն գործունեությունը և համակարգի որոշակիորեն զարգացումն ապահովենք: Դրանից ավելի գումարն էլ արդարացված չէ, քանի որ քաղաքացին տրամաբանական հարց կտա՝ ինչի՞ եմ այսքան վճարում։
Որևէ քաղաքական նպատակադրում չպետք է լինի, որ մենք հաճոյանալու համար այնքան իջեցնենք հոսանքի գինը, որ արդյունքում ոչ մեկ տարի, ոչ երկու տարի, այլ երեք տարի հետո պրոբլեմ առաջանա: Եթե ֆիքսենք, որ, իրոք, բարձր է, պետք է բերենք գիծ, պլյուս պայմանական ասած՝ մի լումա, որ այդ մի լուման ներդրվի հետագա զարգացման համար»,-ասաց Փաշինյանը:
Ռոմանոս Պետրոսյանն իր հերթին նկատեց, որ արդեն պատկերացում ունեն, թե ինչ չափով են կարողանալու հոսանքի գինը վերանայել։
«Լիահույս եմ, որ տարեսկզբից արդեն այդ վերանայման որոշումը կկայացնենք»,- ասաց նա։
