Ադրբեջանական բանակի երկրորդ զինծառայող Հուսեյն Ախլիման օղլու Ախունդովի գրպանում հայտնաբերվել է Զանգեզուրի պղնձամոլիբդենային կոմբինատի աշխատակից Հայրապետ Մելիքսեթյանի հեռախոսը։ Մելիքսեթյանին սպանված են գտել ապրիլի 12-ին։ Սպանությունը կատարվել է Շղարշիկ բնակավայրում գտնվող պահակակետում։
Ադրբեջանցու գրպանում եղել են նաև մեխեր, դիմակ, փամփուշտներ և պտուտակահան։
Ահաբեկչի ն 3 օրվա որոնումներից հետո այսօր հայտնաբերել էին Սյունիքի մարզի Աճանան գյուղից 3 կիլոմետր հեռավորության վրա։
Նա ՀՀ տարածքում գտնվելու ընթացքում սոցիալական ցանցի իր էջում ուղիղ հեռարձակում է արել՝ «լայվ է մտել»։
Համացանցում տարածված տեսանյութում նա դիմում է իր հետևորդներին՝ ասելով․ «Հայերի արյուն ենք թափել։ 4-5 հարյուր հայի գլուխ ենք կտրել։ Հիմա էլ ողջ ենք, չենք զոհվել։ Եթե զոհվենք էլ, թող մեր արածը գնահատվի։ Մենք հայրենիքի դավաճաններ չենք»։ Ինչպես հայտնի է, ապրիլի 10-ին՝ ժամը 01:00-02:00-ն ընկած ժամանակահատվածում, ՀՀ տարածքում հայտնաբերվել և ձերբակալվել էր Ադրբեջանի ԶՈՒ զինծառայող։ Ըստ նրա խոսքի՝ իր հետ եղել էր ևս մեկ զինծառայող։ Նրա որոնողական աշխատանքները շարունակվում էին արդեն 3 օր: Ավելի վաղ Ադրբեջանի ՊՆ-ն հաղորդել էր , որ Նախիջևանի Ինքնավար Հանրապետությունում ադրբեջանական բանակի զինծառայողներ են անհետացել։ Ըստ հաղորդագրության՝ բանակի երկու զինծառայողներ մոլորվել են ոչ բարենպաստ եղանակային պայմանների պատճառով Շահբուզի շրջանի ուղղությամբ։
