Հայաստանում ամեն երկրորդն աղքատ է, ունենք 42% աղքատություն. ոստիկանությանը հատկացված գումարը 6 անգամ գերազանցում է գիտության բյուջեին

42

«Այլընտրանք» հետազոտական կենտրոնի ղեկավար Թաթուլ Մանասերյանի պնդմամբ` հայտնվել ենք պարադոքսալ իրավիճակում, տնտեսական երկնիշ աճին զուգահեռ՝ աճում է նաև աղքատությունը, որն արդեն 42 տոկոս է կազմում։

«Ցանկացած երկրում ուրախալի է, որ տնտեսական աճ է նկատվում, այն էլ երկնիշ, և ակնկալվում է, որ այդ աճը տրամաբանական շղթայով կշարունակվի։ Երբ կա աճ, նշանակում է, որ տնտեսությունը զարգացել է, բացի առանձին կազմակերպությունների բարձր շահույթներից, աճել է նաև աշխատող մարդկանց եկամուտները։ Այս ամենից ելնելով՝ մեր կենսամակարդակն աստիճանաբար պետք է բարելավվի, սակայն մեզ մոտ այդ ամենին զուգահեռ՝ աղքատությունն աճում է»,– նշեց տնտեսագիտության դոկտորը:

Մանասերյանը ձեռնպահ մնաց 2023 թ.-ի ֆինանսական գլխավոր փաստաթղթի ուժեղ կողմերը նշելուց, պնդմամբ՝ առաջին հերթին դա տնտեսության զարգացման ծրագիր է։ Փորձագետի համար անհասկանալի է, թե որ երկրի ու իրավիճակի համար է մշակվել բյուջեն՝ հետպատերազմյան վիճակի վերականգնմա՞ն, կոմունիկացիաների բացմա՞ն, թե՞ այլ իրավիճակների համար է…

«Այս պարագայում տրամաբանության կապի խզում կա, ինչն արտահայտվում է, օրինակ, գիտությանը հատկացված ֆինանսավորմամբ, որը գրեթե 6 անգամ զիջում է ոստիկանությանը տրամադրած ծախսերին։ Դրանք, ի դեպ, շատ ավելի են նույնիսկ բանակին տրամադրվող գումարներից»,– ասաց նա։

Ըստ մասանգետի՝ հարկային եկամուտներն ավելանում են ի հաշիվ եկվորների:

«Այս տարվա ընթացքում 300 հազարից ավելի եկվոր ունենք ոչ միայն ՌԴ–ից, այլև Ուկրաինայից, Բելառուսից և այլ երկրներից։ Սա մեր ազգաբնակչության 10 տոկոսն է, և սա չի կարող չազդել տնտեսության վրա»,– փաստեց Մանասերյանը։

Տարեվերջին ՀՀ–ում կլինի 42% աղքատություն, և ստացվում է, որ ՀՀ ամեն երկրորդ քաղաքացին աղքատ է։