Երկրորդ նախագահ Ռոբերտ Քոչարյանի՝ Հանրային հեռուստաընկերությանը տված հարցազրույցի ընթացքում դարձյալ շոշափվեց ՀԱՊԿ հարցը եւ Ռուսաստանի օգնության չգալու հարցը, կապված ջերմուկյան երկօրյա պատերազմի հետ:
Կարծում եմ, որ այս առնչությամբ երբեք ավելորդ չէ անել երկու արձանագրում: Եթե եղել է հարձակում ՀՀ ինքնիշխան տարածքի նկատմամբ, եթե եղել է ագրեսիա Հայաստանի նկատմամբ, իննչպես պնդում է Հայաստանի իշխանությունը, ապա ինչո՞ւ չի կատարվել Սահմանադրությամբ արձանագրված քայլը՝ չի հայտարարվել ռազմական դրություն: ՀՀ Մայր օրենքով սահմանվում է, որ ՀՀ հանդեպ ագրեսիայի, կամ ագրեսիայի իրական հավանականության պարագայում անգամ՝ հայտարարվում է ռազմական դրություն:
Ինչպե՞ս կարող է կառավարությունը հայտարարել, թե հարձակում է ՀՀ-ի վրա, բայց չանել Սահմանադրությամբ նախատեսված գործողությունը: Սա նշանակում է, որ հայտարարությունը, թե հարձակում է ՀՀ տարածքի վրա, ունեցել է եւ ունի բացառապես քարոզչական նպատակ:
Հետեւաբար, որեւէ կերպ զարմանալի չէ Հայաստանի իշխանության քարոզչական այդ նպատակի հանդեպ ՌԴ ու ՀԱՊԿ «անտարբերությունը»:
Մյուս հանգամանքն այն է, որ կա հայ-ռուսական զորախումբ եւ դրա վերաբերյալ պայմանագիր, որը թույլ է տալիս Հայաստանի դեմ հարձակման դեպքում գործարկել այդ զորախումբը, եթե ՀՀ-ն ի վիճակի չէ իր ուժերով հետ մղել հարձակումը եւ պաշտպանվել: Հայաստանի կառավարությունը ջերմուկյան երկօրյա պատերազմի ընթացքում քանի՞ քայլ է արել, որպեսզի գործարկվի այդ զորախումբը:
Այս հարցերի պարզ բարձրաձայնումը ակնհայտ է դարձնում, որ ՀԱՊԿ ու Ռուսաստանի օգնության «չգալու» թեման բացարձակապես պրոպագանդիստական է, այլ ոչ թե ունի իրական քաղաքական հիմքեր:
Եվ կրկնեմ՝ սա Ռուսաստանին պաշտպանելու, ՀԱՊԿ-ին պաշտպանելու համար չէ, որ ասում եմ: Ինձ բացարձակապես չի հետաքրքրում դա: Ինձ հետաքրքրում է Հայաստանի հանրությանը քարոզչական մանիպուլյացիաներից պաշտպանելը:
Հակոբ Բադալյան, քաղաքական վերլուծաբան
