Կոռուպցիայի կանխարգելման հանձնաժողովը երեք պաշտոնատար անձի վերաբերյալ հաղորդում է ուղարկել ՀՀ գլխավոր դատախազություն։ Այս մասին «Փաստինֆո»-ին հայտնել է հանձնաժողովի նախագահ Հայկուհի Հարությունյանը։
«Բացի Հայկ Սարգսյանից եւս երկու անձի վերաբերյալ հաղորդում ենք ներկայացրել»,- նշել է Հ. Հարությունյանը՝ ավելացնելով, որ հաղորդման հետքերով ձեռնարկված քայլերի արդյունքների մասին տեղեկատվություն դատախազությունից դեռեւս չեն ստացել։
Ինչպես ավելի վաղ տեղեկացրել ենք՝ Հ.Սարգսյանի վերաբերյալ հաղորդումը վերաբերում է նրա հայտարարագրերում հայտնաբերված առերեւույթ կասկածահարույց հանգամանքներին, ինչ վերաբերում է մյուս երկու պաշտոնյաներին, ապա նրանց պարագայում խոսքը չի գնում հայտարարագրում հայտնաբերած խախտումների մասին։ Սակայն, թե ինչն է կոնկրետ հիմք հանդիսացել դատախազություն դիմելու համար նա ձեռնպահ մնաց մանրամասնել։ Փոխարենը չի բացառեց, որ առաջիկայում ևս այլ անձանց վերաբերյալ նոր հաղորդումներ ներկայացնեն դատախազություն։
Ինքը՝ Հ.Հարությունյանը տեղյակ չէ, թե օրինակ, ինչ ընթացք է ստացել իմքայլական պատգամավորի կողմից հնարավոր չարաշահումների վերաբերյալ հաղորդումը, թեեւ արդեն անցել է նյութերի նախապատրաստման համար սահմանված 10 օրյա ժամկետը։ Ըստ նրա՝ «երևի նախաքննության ընթացքի համար իրենք տվյալներ են հավաքագրում»։
Հիշեցնենք՝ հանձնաժողովն արձանագրել էր, որ պատգամավորի 2018-ին ներկայացրած հայտարարագրում եկամուտների էական փոփոխությունը չի հիմնավորվել օրինական եկամտի աղբյուրներով, այսինքն՝ մինչ պաշտոն զբաղեցնելը նա այլ եկամուտ է ունեցել, իսկ դրանից հետո աճը եղել է չհիմնավորված, ինչն էլ կասկած է առաջացրել։
Աղբյուր` Փաստինֆո
