ՔՊ նախընտրական ծրագրում է մետրոյի «Աջափնյակ» կայարանի կառուցման մեկնարկը, ինչպես նաև «Զորավար Անդրանիկ» և «Սասունցի Դավիթ» կայարանների միջև նոր վերգետնյա կայարանի կառուցման մեկնարկը՝ 2033-ին ավարտելու նպատակադրումով, ՔՊ նախընտրական ծրագրի 3-րդ մասը ներկայացնելիս հայտարարեց ՀՀ վարչապետ Նիկոլ Փաշինյանը։
Բացի այդ՝ նախատեսվում է նոր տրանսպորտային միջոցների ձեռքբերում, ինչպես նաև էստակադաների, կամուրջների և այլ ենթակառուցվածքների կառուցում, մարզերում հանրային տրանսպորտային ցանցերի ներդրում։
Ըստ Փաշինյանի՝ նախատեսվում է հիմնել նաև «Տաղանդների հայտնաբերման և զարգացման» հիմնադրամ՝ առավել զարգացնելու առանձանհատուկ ընդունակություններ ունեցող երեխաների տաղանդը։
«Մենք նաև ուզում ենք ստեղծել համակարգ, որ ծնողները հնարավորություն ունենան առավել շահավետ պայմաններով իրենց երեխաների կրթության համար հաշիվներ բացել, ներդրումներ անել։ Բացի այդ՝ պարտավորվում ենք 100 համայնքներում երեխաների խնդրանքով բացել կոմբինացված մարզահրապարակներ»,- նշեց Փաշինյանը։
Նախանշված ծրագրերից նա առանձնացրեց նաև թվային ոստիկանության ձևավորումը՝ նշելով, որ արհեստական բանականությունը ցույց կտա չափանիշներ և ընդհանուր գծեր, թե ինչ պայմաններում են կատարվում հանցագործությունները։
ՔՊ նախընտրական ծրագրի հաջորդ կետը, ըստ Փաշինյանի, վերաբերում է ատոմային նոր էներգաբլոկի կառուցմանը՝ մինչև 2027 թվականի ավարտը։
