«Շատ ցավալի իրավիճակում՝ 44-օրյա պատերազմի ընթացքում, մենք բոլորս տեսանք, թե ինչպես են հայերենին տիրապետում ռազմի դաշտում մեր թշնամիները, նույնիսկ շատ դեպքերում խոսքը շատ չի տարբերվել մաքուր հայերենից, և, բնականաբար, դա հայեր չեն եղել, եղել են, գիտեք՝ ովքեր, և նրանք ինքնուս չեն եղել։ Այո, նրանք ուսուցանել են և հիմա էլ ուսուցանում են։ Միգուցե համատարած չէ»,-Հայաստանի դպրոցներում ադրբեջաներենի ու կամընտրական մյուս լեզուների ուսուցման նոր ծրագրի մասին լրագրողների հետ ճեպազրույցում ասել է ԿԳՄՍ նախարար Վահրամ Դումանյանը։
Որպես կամընտրական լեզուներ՝ դպրոցներին առաջարկվել են ադրբեջաներեն, թուրքերեն, վրացերեն ու պարսկերեն։ Դպրոցի տնօրենները ներկայացրել են, թե աշակերտները հատկապես որ լեզուն են նախընտրում սովորել։ Պարզվել է՝ մեծ մասը հետաքրքրված է ադրբեջաներենով ու թուրքերենով։
Ադրբեջանում, ինչպես հայտնի է, տարիներ շարունակ դասավանդվում է հայերեն։ Համատարած բնույթ չի կրում, բայց այդ երկիրն իր առջև խնդիր է դրել՝ սովորել թշնամու լեզուն։
