Ադրբեջանը հիսթերիայի մեջ է. չէր սպասում, որ հայկական կողմն ապրիլի 11-ի սադրանքի ու ահաբեկչության, այնուհետև՝ պատերազմական գործողությունների տեսագրությունը կունենա և կտարածի։
Ադրբեջանական Report-ը հարցազրույց է արել պատգամավոր Բահրուզ Մահարրամլիի հետ, որն էլ, բնականաբար, խտրականորեն մեկնաբանել է հայկական կողմի քայլերը։
«Այն, որ հայերը սադրանքից անմիջապես հետո նկարներ ու տեսանյութ են տարածել, նշանակում է, որ դա կանխամտածված է եղել։
Լաչինի շրջանի ուղղությամբ Հայաստանի սադրանքը նախապես ծրագրված և մտածված միջադեպ է։ Սա խոսում է այն մասին, որ Երևանը շահագրգռված չէ կայուն խաղաղությամբ, այդ թվում՝ տարածաշրջանում համագործակցության մթնոլորտ ստեղծելով, և չի հրաժարվում իր ռեւանշիստական և ագրեսիվ մտադրություններից»,-ասել է ադրբեջանցի պատգամավորը։
Պատգամավորը նշել է, որ Ադրբեջանի նախագահ Իլհամ Ալիևն այս տարվա հունվարին տեղական հեռուստաալիքներին տված հարցազրույցում ասել էր, որ ԵՄ առաքելության ժամանումը տարածաշրջան ավելի կուժեղացնի լարվածությունը. «Իսկապես, տարածաշրջան ժամանելուց հետո առաքելությունը նախ և առաջ իր ոչ ադեկվատ պահվածքով լուրջ հարցեր առաջացրեց, այդ թվում՝ Հայաստանի կողմից հրադադարի համառ և սադրիչ խախտման, ինչպես նաև ԵՄ առաքելության՝ այդ միջադեպերին արձագանքելու անկարողության։
Եվս մեկ անգամ բացահայտվեցին եվրոպացիների տհաճ մտադրությունները»:
Պատկերացնում ենք՝ Ադրբեջանը ինչպիսի ջանքեր պիտի գործադրի, հերթական զեղծարարությունը տարածի, բոլորի աչքին թոզ փչի, որպեսզի իր կողմից նախաձեռնված ահաբեկչությունը կարողանա մատուցել որպես «ինքնապաշտպանություն»։
Առաջին քայլերն արդեն սկսվել են՝ «եթե կա տեսանյութ, ուրեմն նախապես ծրագրված սադրանք է»։
