«Մենք մաքսիմալ պատասխանատու պետք է գործենք։ Կան սպառնալիքներ, կան հնարավորություններ, և մենք պետք է այդ ամենի հետ հարաբերվենք։ Ինչ վերաբերվում է խաղաղություն մուրալուն, ես ձեզ հետ համաձայն եմ, որ մուրալով խաղաղություն հնարավոր չի ունենալ։ Խաղաղություն հնարավոր է ունենալ՝ խաղաղությունը վաստակելով։
Կա խոսույթ, որ խաղաղություն հնարավոր է ունենալ՝ պարտադրելով խաղաղություն։ Մեր փորձը ցույց տվեց, որ դա էլ չի ստացվում։ Խաղաղությունը պետք է վաստակել, դա ակնհայտ է։ Միանշանակ համաձայն եմ, որ մուրալով խաղաղություն հնարավոր չի ստանալ»,- հունվարի 10-ին հրավիրված մամուլի ասուլիսի ժամանակ ասաց ՀՀ վարչապետ Նիկոլ Փաշինյանը։
Խաղաղության մասին մինչ այժմ եղած աշխարհաքաղաքական ճշմարտությունները նա ծալել- միկողմ է դրել, թե, օրինակ, եթե խաղաղություն ես ուզում, պատրաստվիր պատերազմի, խաղաղության ձգտողը պետք է հզոր ու մարտունակ բանակ ունենա, ուժեղի, խաղաղություն պարտադրողի հետ են հաշվի նստում և այլն։
Փաշինյանն ասել է՝ խաղաղությունը պետք է վաստակել։ Խաղաղության փաշինյանական թեզը բացահայտելու համար վերլուծաբաններն ու պատմաբանները դեռ երկար պիտի գլուխ ջարդեն։
«Մենք խաղաղություն կարող ենք ունենալ, եթե մենք ի վիճակի լինենք հանդուրժող հարաբերություններ հաստատել Թուրքիայի և Ադրբեջանի հետ, որոշակի համաձայնությունների դաշտ ձևավորել։ Եվ զարգացնել մեր հարաբերությունները Իրանի Իսլամական Հանրապետության և Վրաստանի հետ։ Այս է խաղաղության բանաձևը։ Եվ միջազգային հանրության այն ռեսուրսները, որոնք մեզ կարող են օգնել այս հարցում, այդ ռեսուրսները պետք է անպայման օգտագործել։ Ադրբեջանի և Թուրքիայի հետ հարաբերությունների կարգավորմանը հավատում եմ մի պատճառով, որ որևէ բան անելուց առաջ պետք է հավատալ դրան։ Եթե չենք հավատում, ինչո՞ւ ենք բանակցում, ձև ե՞նք անում։ Ձևի համար բանակցությունը լավ տեղ չի տանում»,- եզրափակել է Փաշինյանը։
