Քիչ առաջ 44–օրյա պատերազմում զոհված զինծառայող Կարապետ Բուռնազյանի մայրը՝ Անահիտ Պապատյանը դուրս եկավ ոստիկանության բաժնից։
Նա ներկայացրեց դեպքի մանրամասները, որի հետ կապված այսօր բերման է ենթարկվել. «Դեպքը տեղի է ունեցել 2025 թվականի փետրվարին, ուղեվարձի բոյկոտի ակցիա էի իրականացնում, Մաշտոցի փողոցից դեպի Բաղրամյան փողոց խաչմերուկ թեքվելու ժամանակ տրոլեյբուսից երբ իջանք, իմ հետ էլի մարդիկ կային, վարորդը իջնողների հասցեին սեռական բնույթի հայհոյանքներ հնչեցրեց։ Ես ինքնատիրապետումս կորցրեցի, զայրացա ու ձեռքիս շիշը մի կողմ նետեցի։ Միտումնավոր չեմ նետել վարորդի կամ ավտոբուսի կողմը, բայց նման վերաբերմունքը կարծում եմ՝ վարորդի կամ հսկիչի ուղիղ անմիջական պարտականությունների մեջ չի մտնում։
Եթե ես ոչ թույլատրելի բան էի արել կամ տրանսպորտի գումարը չէի վճարել, դրա համար ընդամենը ինձ կարող էր հսկիչը տուգանել ու վերջ»։
Անահիտ Պապատյանը նշեց, որ երբ այսօր ոստիկանները եկել են իրենց տուն, ինքը տանը չի եղել, տանը եղել է իր փոքրահասակ երեխան ու մայրը. «Դե մայրիկս տարիքով կին է, խուճապի էր մատնվել։ Ոստիկանությունը նորմալ սպասել էր մինչև ես գայի։ Մայրս ինձ զանգեց, ասեց՝ արի, այստեղ այսպես մարդ կա։ Ոստիկանները մեզ նորմալ բերեցին բաժին։
Երբ ինձ բերեցին այստեղ, ես առաջինը հարցրեցի՝ եթե դուք ինձ բերել եք պարզաբանման, տրոլեյբուսի վարորդը այստե՞ղ է։ Ինքն իրավունքը ունի կանգառում, մեծ մասայի մեջ ինձ հայհոյանք տա՞»։
Անահիտի պաշտպանն էլ հավելեց, որ ոստիկանությունում կինը պարզաբանում է գրել, որ աֆեկտի տակ քաղաքացին ինքնատիրապետումը կորցրել է և ձեռքի եղածը նետել է դեպի ավտոբուսը։
