ՀՀ առողջապահության նախարար Անահիտ Ավանեսյանն այսօր լրագրողների հետ հանդիպման ժամանակ հայտարարեց՝ առողջապահության նախարարությունը պատրաստվում է առաջիկայում քննարկել օնլայն-տաքսի վարորդներին համապարփակ բժշկական ապահովագրության համակարգում ներառելու վերաբերյալ։
«Քաղաքացիաիրավական պայմանագրով աշխատողներն ապահովագրվելու են 2027 թվականի հունվարի 1-ից, բայց ինձ համար շատ ուրախալի է, որ տաքսու վարորդները, տեսնելով ապահովագրության ոլորտի այն կարևոր ձեռքբերումը, որն այժմ ունեն մեր այլ քաղաքացիները, որոշել են հայտ ներկայացնել ապահովագրական համակարգում ընդգրկվելու համար։
Առաջիկայում մենք կքննարկենք այդ հարցերը և կհասկանանք, թե ինչ հնարավորություններ ունենք մինչև 2027 թվականի հունվարի 1-ը նրանց դիմումները դիտարկելու համար», – ասաց նախարարը։
Հիշեցնենք, որ առցանց տաքսիների վարորդները Երևանում բողոքի ակցիա էին կազմակերպել՝ բողոքելով գանձվող բարձր սակագների դեմ։ Նրանք պահանջում էին նվազեցնել յուրաքանչյուր պատվերից պահվող տոկոսադրույքը, ինչպես նաև գրանցել իրենց որպես օրինական աշխատողներ, որպեսզի կարողանան օգտվել համապարփակ բժշկական ապահովագրության ծառայություններից։
