ՀԷՑ-ում գնումների գործընթացի հետ կապված մենք նախկինում էլ բազմիցս քննարկումներ ունեցել ենք. տնտեսությունից ազդակներ են եկել, որ գնումներում հիմնականում մասնակցություն են ունենում փոխկապակցված կազմակերպություններ, այսինքն՝ ՀԷՑ-ի սեփականատերերի խումբը կամ ղեկավարության խումբը ստեղծում է ընկերություններ՝ կա՛մ իրենք անձամբ, կա՛մ իրենց հետ կապված անձանց միջոցով, որոնք մասնակցում և հաղթում են գնումների գործընթացը։ Այս մասին այսօր հայտարարեց ՀՀ վարչապետ Նիկոլ Փաշինյանը՝ ՀԷՑ-ի ժամանակավոր կառավարիչ Ռոմանոս Պետրոսյանի հետ աշխատանքային հանդիպման ժամանակ։
Փաշինյանը նշեց, որ սա տնտեսության զարգացումը և մրցակցային վիճակը խոչընդոտող վիճակ է։
Ռոմանոս Պետրոսյանն իր հերթին հավելեց, որ դա արտոնյալ և մենաշնորհային դիրք է տալիս, ինչը ուղիղ օրենսդրության և ՀԾԿՀ-ի կողմից սահմանված կարգի ուղիղ խախտում է։
«էներգետիկ ոլորտի թե արտադրողները, թե ներկողները բոլորը փակուղու առաջ էին, որովհետև որևէ հնարավորություն չունեին ՀԷՑ-ի նման ռազմավարական կարևորագույն խոշոր ընկերության տնտեսական արժեշղթային որևէ կերպ մաս կազմելու։
Օրինակ բերեմ. իրենց իսկ հաստատած գնումների պլանով, օրինակ, կցորդիչների գնման համար, որը կիրառվում է մալուխային գծերի վթարների ժամանակ, նույն տեսակի, նույն տեխնիկական բնութագիր ունեցող, նույն քանակի գնման խմբաքանակը նախատեսված էր 128 միլիոն դրամի, և կոնկրետ ընկերություն կար նախանշված, ում առաջարկած գնով էլ գնման պլանը կազմել էին։
Մենք բաց, թափանցիկ, ներառական երեք փուլից բաղկացած գնումների գործընթաց իրականացրեցինք, և 128 միլիոն դրամ գնումների պլանում դրված նույն քանակի, նույն բնութագրող ապրանքը ձեռք բերեցինք ընդամենը 58 միլիոն դրամով։ Միայն 70 միլիոն դրամ խնայում ենք արել այդ գործարքում։
Մեկ այլ հատկանշական օրինակ. գնումների պլանում դրված է, որ ուժային մալուխի միավոր գծամետրը 30 000 դրամ է։ Կոնկրետ ընկերություն, որը մինչ այս տարիներ ի վեր հարյուրավոր միլիոն դրամների մատակարարել է ՀԷՑ-ին, այդ ընկերությունը գալիս է, առաջարկ է անում 30,000 դրամի փոխարեն 19,200 դրամ։ Վերասակարկման արդյունքում տվյալ ընկերությունը, որը տվյալ ուժային մալուխը ավանդաբար մատակարարել է 28-ից 30,000 դրամով, մատակարարում է 18,400 դրամով։ Այսինքն՝ կարող ենք ասել, որ առնվազն ապրանքանյութական արժեքների մատակարարումները տևական ժամանակ իրականացվել են առնվազն 60-70, մինչև 100 տոկոս ուռճացված գներով։ Սա ուղղակիորեն մտել է սակագին»,-նշեց Ռոմանոս Պետրոսյանը՝ հավելելով, որ այս ամենը դրվել է վարույթների հիմքում։
Վերջում Նիկոլ Փաշինյանը նկատեց՝ սրանք շատ կոնկրետ փաստեր են, և այսպիսի երևույթները իրավաբանները փողի լվացում են կոչում։
«Այն, ինչ որ նկարագրում եք և եթե հիմնավորված է, ըստ էության, դա այլ անուն, քան փողերի լվացում, դժվար է գտնել»,- ասաց նա։
