Աշխարհում չկա քաղաք, որի սկզբունքը հետևյալը չլինի. հանրային տրանսպորտը պետք է ունենա առաջնահերթություն: Այս մասին այսօր լրագրողների հետ զրույցում նշեց Երևանի փոխքաղաքապետ Արմեն Փամբուխչյանը՝ անդրադառնալով Երևանում երթևեկության կանոնների փոփոխությունից քաղաքացիների դժգոհությանը։
«Այո, հանրային տրանսպորտի համար պետք է առանձնացված լինեն գծեր, որպեսզի հանրությունը, որ օգտվում է տրանսպորտից, ավելի արագ հասնի, քան մեքենաները։ Այդ նույն խցանման մեջ մենք էլ ենք մնում։ Տրանսպորտի բարեփոխումների տրամաբանության համար դա նորմալ է, որ տրանսպորտի համար առանձին գիծ լինի»,- նշեց փոխքաղաքապետը։
Դիտարկմանը, որ ավտոբուսի գիծը փողոցի հենց մեջտեղով է անցնում, և կանգառ անելու համար պետք է վերադասավորվի, փոխքաղաքապետն ասաց, որ հաշվի առնելով ստեղծված խնդիրներ՝ որոշ վերանայումներ կարվեն. «Կհետևենք, թե ինչ տեղի կունենա, և որոշ վերանայումներ կլինեն»,- ասաց նա։
