Խաղաղությունը լավ բան է, բայց մուրալով չի տրվում, իսկ Իրանը և Իսրայելը լավ գիտեն դրա գինը. վերլուծություն

Նախ սա խաղաղություն չէ, այլ՝ հրադադար. նկատում է միջազգայնագետ Սուրեն Սարգսյանը և մեկնաբանում իրան-իսրայելական հակամարտոթյանը միացած ԱՄՆ-ի դիքորոշումն ու հրադարդար հայտարարելու հանգամանքները։

Միջազգայնագետը գրում է.

Խաղաղության հասնելու համար առնվազն անհրաժեշտ է անցնել երկար և դժվար ճանապարհ։ Մենք էլ հրադադար ենք ստացել 2020 թվականին, սակայն մինչև հիմա խաղաղության դարաշրջանը դեռ չի երևում։

Ավելին, Իրանի և Իսրայելի միջև ընթացած պատերազմում որևէ մեկը լիարժեք հաղթող կամ պարտված չէ։ Կողմերը պարզապես որոշել են կանգ առնել ճիշտ ժամանակին՝ գերտերության հորդորով (և հնարավոր է՝ միջնորդությամբ)։

Եթե որևէ մեկին թվում է, թե Իրանը և Իսրայելը կարող են գտնել այնպիսի լուծումներ, որոնք միաժամանակ կընդունելի լինեն թե՛ Իսրայելի, թե՛ Իրանի, և նույնիսկ ԱՄՆ ժողովրդի համար, ապա նա լուրջ սխալվում է։ Վերջիվերջո սա ոչ առաջին, ոչ էլ վերջին հրադադարն է այս տարածաշրջանում։

Ինչ վերաբերում է Հայաստանին, ապա կրկնեմ՝ մեր կենսական շահը ռուս-ամերիկյան և իրան-ամերիկյան հարաբերությունների կայունացման մեջ է։

Խաղաղությունը լավ բան է, բայց մուրալով չի տրվում։ Իսկ Իրանը և Իսրայելը լավ գիտեն դրա գինը։

Վերջիվերջո, միայն վերջին 15 ամիսների ընթացքում սա արդեն երրորդ ուղիղ բախումն էր այս երկու երկրների միջև։