Երեւանի բոլոր կինոթատրոններում մարտի 21-ից կցուցադրվի «Կատարյալ ապուշը» ռոմանտիկ կատակերգությունը: Նոր ֆիլմի մասին «Ազգը» զրուցել է ֆիլմի ռեժիսոր, սցենարի հեղինակ, դերասան Տիգրան Նալչաջյանի հետ:
«Ֆիլմի սցենարը գրել եմ 2022 թ. ամռանը, հետո մի քանի ամիս մշակել եմ այն: Մինչ այդ կար այլ ֆիլմ նկարելու ցանկություն, որի սցենարը պատրաստ էր, սակայն ունեի ներքին զգացողություն, որ այս պահին ցանկանում եմ նկարահանել որեւէ յուրահատուկ եւ տարբերվող ֆիլմ՝ կատակերգական ժանրով», – պատմում է Տիգրանը՝ հավելելով, որ այդպիսի ֆիլմ նկարահանելն իր վաղեմի իրազանքն էր, իսկ ֆիլմի սցենարը գրելու հարցում իրեն շատ է օգնել երկարատեւ այցը Լոռվա լեռներ:
Ֆիլմի նկարահանումներն սկսվել են 2023 թ. ամռանը, ֆիլմի վրա աշխատել է պրոֆեսիոնալ անձնակազմ, դերերում ճանաչված եւ սիրված դերասաններ են: «Դերասանների ընտրությունը կատարվել է կերպարային համապատասխանությամբ, նրանց որակներն ու տաղանդը գնահատելով: Այս ֆիլմում վատ խաղացող դերասան չկա, անգամ էպիզոդիկ դերերում»,- ընդգծում է Տիգրանը:
Պատմության գլխավոր հերոսը Տիգրիսն է, որին մարմնավորում է հենց ինքը՝ Տիգրանը. «Նա շատ բարի ու դրական կերպար է, որը շարունակ ձգտում է փոխել աշխարհը դեպի լավը, մարդկանց միջից հանել չարությունը, ինչի պատճառով ընկնում է շատ ծիծաղելի արկածների մեջ: Ամեն անգամ հայտնվում է տարբեր իրադարձությունների կիզակետում՝ հանցագործների մոտ, ոստիկանությունում, կրոնական կազմակերպությունում, ծեծկռտուքներում եւ այլն»:
Հետաքրքրական ու նուրբ սիրո պատմությունը ամբողջացնում ֆիլմը: Ռեժիսորը վստահ է, որ երկրի համար այս ծանր ժամանակաշրջանում այս ֆիլմը, բացի հաճելի ժամանց պարգեւելուց, կլինի նաեւ հույսի ու բարության փոքրիկ կղզյակ հանդիսատեսի համար: Ֆիլմը պարզ է, հեշտ ընկալելի, կան տողատակի ասելիքներ, որոնք ըստ ռեժիսորի՝ հանդիսատեսը առանց դժվարության կընկալի:
Երկար տարիներ զբաղվելով մարտարվեստով՝ Տիգրանն ինքն է ֆիլմերում բարդ հնարքները անում, իսկ վերջին օրվա հետաքրքրական նկարահանումներից մի դրվագի մասին սիրով պատմեց մեզ. «Պետք է չափազանց բարդ հնարք անեի, որի նմանը հայկական կինոյում դեռ չէր եղել: Մի ոտքս պետք է դնեի ավտոմեքենայի վրա, մի ոտքս էլ մնար գետնին: Մեքենան պետք է ընթանար եւ բացվեր իմ շպագատը ու այդպես ինձ քաշելով տաներ»: Նրա խոսքից պարզվում է, որ այդ նկարահանումը հատուկ վերջին օրվա էին թողել, որպեսզի եթե գլխավոր հերոսը վնասվածք ստանար, մնացած նկարահանման օրերը չտուժեին: Ամեն ինչ բարեհաջող է անցել, առանց որևէ վնասվածքի, իսկ այդ կադրը տեղ է գտել թրեյլերում:
«Վստահ եմ, որ բոլորը դահլիճից դուրս են գալու հաճելի զգացողություններով, ժպիտները դեմքներին: Սա այն ֆիլմերից է, որը կսիրի հանդիսատեսը: Անձամբ ես շատ մեծ հույսեր ունեմ այդ առումով: Այսպիսի ֆիլմ ստեղծելու նպատակն, ինչպես արդեն ասացի, մեր քաղաքացիների ընկճված վիճակն է, պետք է նրանց դուրս բերել այդ վիճակից: Կինոն մեծ ազդեցություն ունի եւ կարող է նպաստել դրան», – ամփոփում է ռեժիսորը:
ԱՆՆԱ ՀԱՐՈՒԹՅՈՒՆՅԱՆ
ՀՊՄՀ լրագրության բաժնի ուսանողուհի
Լուսանկարները տրամադրել է Տիգրան Նալչաջյանը
