«Գյումրիի դարբնության ավանդույթը» հայտը գրանցվել եւ ներառվել է ՅՈՒՆԵՍԿՕ-ի Մարդկության ոչ նյութական մշակութային ժառանգության ներկայացուցչական ցանկում: Որոշումը կայացվել է ՅՈՒՆԵՍԿՕ-ի «Ոչ նյութական մշակութային ժառանգության պաշտպանության մասին» կոնվենցիայի 18-րդ միջկառավարական նստաշրջանում, որը տեղի է ունեցել 2023թ. դեկտեմբերի 4-9-ին՝ Բոտսվանայի Կասանե քաղաքում:
Հայտը նստաշրջանում ներկայացվել է ՀՀ կրթության, գիտության, մշակույթի եւ սպորտի նախարարության կողմից: Հայտի փաթեթում կարեւոր տեղ ունի հատուկ գրավոր ձեւաչափը, որտեղ ներկայացվում է արժեքի բնութագիրը:
Այս հետազոտության գիտական արդյունքը եղել է Գյումրիի դարբնության ավանդույթի՝ որպես ոչ նյութական մշակութային արժեքի՝ միջազգային չափանիշներին համապատասխանող բնութագիրը ներկայացնող տեքստի կազմումը: Ներկայացվել են քաղաքային դարբնության առանձնահատկությունները, արհեստի զարգացման եւ ժառանգականության դրսեւորումների կարեւորությունը, ինչպես նաեւ սերնդեսերունդ արհեստը փոխանցելու մշակութային համատեքստը: Ներկայացված աշխատանքի կարեւոր գիտական արդյունքներից է նաեւ Գյումրի քաղաքի դարբնության ինքնատիպությունը ներկայացնող մշակութային նրբերանգների վերլուծությունը:
«Գյումրիի դարբնության ավանդույթը» հայտի պատրաստումը եւ դրա համար անհրաժեշտ հետազոտությունն իրականացվել է ՀՀ ԿԳՄՍՆ-ի եւ «Հովհաննես Շարամբեյանի անվան ժողովրդական արվեստների թանգարանի» պատվերի եւ այն վավերացնող մասնագիտական ծառայությունների մատուցման պայմանագրի շրջանակներում:
ՍՏԵՓԱՆ ՊԱՊԻԿՅԱՆ
