Հուշ-երեկո նվիրված Ստեփան Ալաջաջյանին
Թեքեյան Մշակութային Միության Լոսանջելեսյան գլխավոր գրասենյակը Գլենդելի կենտրոնական գրադարանի դահլիճում հոկտեմբերի 5-ին հուշ-երեկո է կազմակերպել նվիրված վիպասան, թարգմանիչ եւ հասարակական գործիչ Ստեփան Ալաջաջյանին, տեղեկացնում է Ջեյն Պարտիզպանյանը «Արմինյն Միրոր-Սփեքթեյթր» շաբաթաթերթում: Հանդիսությանը ներկա են գնտվել հայ համայնքի ղեկավարներ, արվեստագետներ, Լոս Անջելեսում ՀՀ գլխավոր հյուպատոս դոկտ. Կարեն Իսրայելյանն իր տիկնոջ հետ, Հայ եկեղեցու արեւմտյան թեմի առաջնորդ Տ. Հովնան արք. Տերտերյանը եւ օտարազգի ներկայացուցիչներ:
Ստեփան Ալաջաջյանը ծնվել է 1924 թվի հունվարի 3-ին Հալեպում (Սիրիա), որտեղ էլ հայկական վարժարանում միջնակարգ կրթությունը ստանալուց հետո սովորել է տեղի ամերիկյան քոլեջում եւ այնուհետեւ Բեյրութի Ամերիկյան համալսարանում: Հայաստան է նեղգաղթել 1946-ին, որտեղ 1951-ին ավարտել է Երեւանի պետական համալսարանի բանասիրական ֆակուլտետը: Ապա հետեւել է Մոսկվայի երկամյա գրական բարձրագույն դասընթացներին: Վերադառնալով Երեւան՝ աշխատել է «Սովետական գրականություն» ամսագրի խմբագրությունում, այնուհետեւ «Հայաստան» հրատարակչությունում որպես գրականության բաժնի վարիչ: 1966 թվականից եղել է Հայաստանի Գրողների միության վարչության քարտուղարը: 1970-ին պարգեւատրվել է «Մշակույթի վաստակավոր գործիչ» շքանշանով: Անդամակցել է ՌԱԿ-ին: 1942-ին Հալեպում լույս է տեսել նրա բանաստեղծությունների ժոողվածուն՝ «Վշտի ծաղիկներ» վերնագրով: Այնուհետեւ Երեւանում հրատարակել է «Անապատում» եւ «Պարտություն» վիպակները, որոնք Մոսկվայում լույս են տեսել 1961 թվին «Տափակ կտուրներ» վերնագրով: Գրել է նաեւ «Փյունիկ», «Առանց հայրենիքի» եւ «Եղեգները չխոնարհվեցին» (գիրք 1-2) վեպերը: Անգլերենից կատարել է թարգմանություններ Վ. Շեքսպիրի, Հ. Ուելսի, Վ. Սարոյանի, Ժ.Պ. Սարտրի ստեղծագործություններից: Իր գործերում պատկերել է Միջին Արեւելքի ժողովուրդների ազգային-ազատագրական շարժումների առանձին դրվագներ, նաեւ սփյուռքահայության հոգեկան կապը Մայր Հայրենիքի հետ: 1991-ին առողջական վիճակի վատթարացման հետեւանքում տեղափոխվել է ԱՄՆ, Լոս Անջելես, որտեղ էլ իր մահկանացուն է կնքել 2010 թվին:
Հուշ-երեկոն սկսվել է մեծ էկրանի վրա ընտանեկան հիշարժան լուսանկարների ցուցադրումով, որոնցում հայտնվել են գրական-գեղարվեստական բնագավառի անմոռանալի անձնավորություններ, ինչպիսիք են Պ. Սեւակը, Ս. Կապուտիկյանը, Լ. Զաքարյանը, Խորեն Պալյանը եւ Ս. Սարգսյանը:
Հանդիսությունը վարել է ԹՄՄ Լոս Անջելեսի գրասենյակի փոխատենապետ Սեւան Տեր-Պետրոսյանը: Գլխավոր բանախոս Հրաչ Սեփեթճյանը շեշտել է նման միջոցառումներով հայկական մշակույթը վառ պահելու կարեւորությունը: Ելույթ են ունեցել նաեւ ՀՀ գլխավոր հյուպատոս դոկտ. Կարեն Իսրայելյանը, եղբորորդին՝ Ամերիկայի հայկական թանգարանի ճարտարապետ Արամ Ալաջաջյանը, որն իր ելույթի վերջում Ալաջաջյանի դստերը՝ Թերեզա Հայրապետյանին նվիրել է իր հոր ձեռագրերից 10 էջ: Ասմունքող եւ գրաքննադատ Նունե Ավետիսյանը հատվածներ է կարդացել Ալաջաջյանի գործերից: Գեղարվեստական բաժնում դաշնակահարուհի Հռիփսիմե Ռշտունին անմոռանալի պահեր է պարգեւել ներկաներին՝ նվագելով Ալ. Հարությունյանի «Գարուն ա» եւ Առ. Բաբաջանյանի «Վաղարշապատի պար» ստեղծագործությունները:
Միջոցառումը ավարտվել է Առաջնորդ Տերտերյանի ջերմ հիշողություններով եւ հայր Նժդեհ Քեշիշյանի օրհնությամբ:
Անգլ. բնագրից պատրաստեց ՀԱԿՈԲ ԾՈՒԼԻԿՅԱՆԸ
(Armenian Mirror-Spectator)
