Դավիթ եւ Արմինե Ամալյանների համերգ-երեկոն Գերմանիայում

Մայիսի 6-ից 10-ն ընկած ժամանակահատվածում Գերմանիայի երեք քաղաներում՝ Բեռլինում, Աշաֆֆենբուրգում եւ Մյունխենում հայ հանդիսատեսի համար տեղի կունենա  Դավիթ եւ Արմինե Ամալյանների «Շնորհակալ եմ» խորագրով հեղինակային երգերի համերգ-երեկոն:Միջոցառմանը իրենց մասնակցությունը կունենան նաեւ ասմունքող Մարինա Հովհաննիսյանը եւ դաշնակահար Հայկ Նավասարդյանը: Միջոցառման կազմակերպման նպատակի եւ սփյուռքում հայ մշակույթի ներկայացուցչության մասին զրուցեցինք  երեկոյի պրոդյուսեր Էրիկ Բարսեղյանի հետ:

-Ինչպե՞ս որոշվեց կազմակերպել այս համերգ-երեկոն:

-Նախատեսվում էր Դավիթ Ամալյանի համերգային շրջագայությունը Եվրոպայի մի քանի երկրներում: Առաջարկեցինք նույն ծրագրով հանդես գալ նաեւ Գերմանիայի երեք քաղաքներում, որին երգիչը դրական արձագանքեց:

-Կա՞ն արդեն արձագանքներ հայ համայնքի կողմից:

-Ինչպես Հայաստանում, այնպես էլ արտերկրում ապրող հայերը սիրում են Դավիթ Ամալյանին եվ նրա ստեղծագործությունները: Այդ մասին են վկայում համերգի պաստառները տեղեկատվական տարբեր հարթակներում շրջանառվելուց անմիջապես ստացած հետադարձ արձագանքները: Ծրագիրն ավելի է հետաքրքրական դառնում, երբ հանդիսատեսը բեմում առիթ ունի վայելելու նաեւ Դավիթ Ամալյանի կնոջ՝ Արմինե Ամալյանի կատարումները: Եվ այս ամենն ուղեկցվելու է Մարինա Հովհաննիսյանի պոեզիայի կատարմամբ:

-Որն է՞ լինելու երեկոյի ասելիքը եւ նպատակը:

-Ասելիքն, ըստ էության, հենց Ամալյանի խոհերն են՝ վերածված երգերի: Դավիթ Ամալյանի ստեղծագործությունները դիպչում են հանդիսատեսի հոգուն ու սրտին, խորհելու առիթ են տալիս ունկնդրին եւ ստեղծում ջերմ միջավայր: Գործ ունենք խոր մտածող արվեստագետի հետ, մարդ՝ որի կյանքն ունի գերհագեցած անցյալ եվ ներկա: Եվ չնայած իր կյանքում տեղի ունեցած՝ թվում է անհաղթահարելի իրողություններին, Դավիթ Ամալյան պոետի տողերում տեսնում ենք ապագայի հանդեպ հավատի լույսը, տեսնում ենք հայրենիքի հանդեպ անծայրածիր սերն ու նվիրումը: Այստեղից է բխում նաեւ համերգի «Շնորհակալ եմ» անունը կրող խորագիրը: Սա ըստ էության մեր շնորհակալությունն է Դավիթ եւ Արմինե Ամալյաններին եվ բոլոր այն հայրերին ու մայրերին, որոնք ամենաթանկն են նվիրել հայրենիքին:

-Շարունակակա՞ն է լինելու ձեր գործունեությունը, միտված նմանատիպ միջոցառումների կազմակերպմանը սփյուռքահայության համար:

-Գիտե՞ք, որեւէ ազգ, իր հայրենիքից դուրս կանգնած է ասիմիլյացիայի ռիսկի առջեւ: Սա իրողություն է, որն անտեսել չի կարելի: Այսպիսի նախագծերը նախեւառաջ պետք է ուղղված լինեն հայկական համայնքների հատկապես երիտասարդ սերունդներին, նրանց՝ հայ ստեղծագործողին, հայ երգին, հայ բառ ու բանին ծանոթացնելուն: Արտերկրում ապրող պատանիները, հատկապես նրանք, որոնք ծնվել են այստեղ, անպայման պետք է ազգային ինքնաճանաչման կրթություն ստանան: Սա խիստ կարեւոր ենք համարում: Այս առումով Բեռլինում հսկայածավալ աշխատանք է իրականացնում նաեւ Հայ-Գերմանական մշակութային կենտրոնը, որն էլ, հենց Դավիթ Ամալյանի բեռլինյան համերգի նախաձեռնողն է:

-Մե՞ծ է արդյոք հայկական մշակույթի պահանջարկը եւ կարիքը արտերկրում բնակվող մեր հայրենակիցների համար:

-Ինչպես արդեն նշեցի, պահանջարկը պետք է ստեղծել խելացի եւ օգտակար առաջարկություններով: Հայ-գերմանական մշակութային կենտրոնում հայ պատանիների եվ երիտասրադների համար դասավանդվում են հայոց լեզու, ազգային պար, երգարվեստ, խոսքի կուլտուրա առարկաները, գործում է թատերական ստուդիա, կա նախադպրոցական խմբակ, առաջիկայում նախատեսվում է երաժշտական բենդի ստեղծում: Ինչ վերաբերում է Հայաստանից այլ արտիստներ հրավիրելուն, ապա, այո, այդ գաղափարը կա: Եվ խոսքը միայն երգարվեստի մասին չէ, թատերական ներկայացումներ, կինոցուցադրություններ, անհատ ստեղծագործողների հրավերներ եվ այլն: Այս նույն տրամաբանությամբ, կենտրոնի տնօրեն Արտակ Կիրակոսյանի հրավերով տարիներ առաջ Բեռլինում մենահամերգով հանդես է եկել նաեւ սիրված երգիչ Ռուբեն Հախվերդյանը: Կորոնավիրուսով պայմանավորված սահմանափակումներն ու աշխարհում ընթացող այլ պրոցեսներ, բնականաբար իրենց բացասական ազդեցությունն են ունենում բոլոր ոլորտներում: Հուսանք շուտով կյանքը կվերադառնա իր բնականոն ընթացքին, եվ մենք, անշուշտ կիրականացնենք նաեւ նոր ծրագրեր: Մենք փորձում ենք մեր ներդրումն ունենալ Բեռլինում ապրող հայերի մշակութային կյանքում:

ԳԵՎՈՐԳ ՄՈՂՐՈՎՅԱՆ