Թատրոնի միջազգային օրը Երեւանի թատրոնի եւ կինոյի պետական ինստիտուտի Գյումրու մասնաճյուղի սրահում յուրատեսակ միջոցառում էր կազմակերպվել: Այն մեկ նկարի ցուցահանդես էր, հարգանքի տուրք՝ ոլորտի եւ այս քաղաքի վառ դեմքերից մեկի` ամիսներ առաջ կյանքից հեռացած դերասանուհի, բեմադրիչ եւ այս բուհի դոցենտ, ՀՀ արվեստի վաստակավոր գործիչ Սիրանույշ Ղուկասյանի հիշատակին:
Զարմանալի են մարդկային մտքի երեւակումները հաճախ: Մահկանացուն կնքելուց ոչ շատ ժամանակ առաջ, երբ ոչինչ չէր նախանշում մոտալուտ նման ելքը, այս ճանաչված մտավորական տիկինը դիմել էր համաքաղաքացի վաստակավոր նկարիչ Սամվել Լաճիկյանին՝ իր դիմանկարը վրձնելու խնդրանքով: Նկարիչը սիրով համաձայնել, սկսել էր այդ գործը եւ շարունակել նաեւ արվեստագետի մահվանից հետո: Ավելի քան կես տարվա ընթացքում ստեղծված ջրաներկ այդ դիմանկարն էլ ցուցադրվեց եւ առաջին անգամ ներկայացվեց մասնաճյուղի դասախոսական անձնակազմին, ուսանողությանը եւ քաղաքի ներկա արվեստասերներին:
Դիմանկարը բազմաժանր ու բազմաոճ նկարիչ Սամվել Լաճիկյանի նախասիրած ժանրերից է, իսկ թերեւս առավել դժվար՝ ջրաներկ դիմանկարի վարպետ նա վաղուց է: Սիրանույշ Ղուկասյանի այս նկարը բնորոշվում է իբրեւ հոգեբանական դիմանկարի հաջողված օրինակ՝ բնորդի հարուստ ներաշխարհի ցուցադրմամբ եւ անցյալ, բայց ոչ կորուսյալ գեղեցկության ու հմայքի տպավորիչ պատկերմամբ:
ԳԵՂԱՄ ՄԿՐՏՉՅԱՆ
