«Հայաստան» խմբակցության պատգամավոր Անդրանիկ Թևանյանն իր ֆեյսբուքյան էջում գրել է.
«Ինչու են ակտիվացել ադրբեջանցի «բնապահպանները» և ինչու է պարբերաբար փակվում Արցախ–Հայաստան կյանքի ճանապարհը
Ադրբեջանցիները հերթական անգամ փակել են Արցախ–Հայաստան մայրուղին։ Սա 2020–ի նոյեմբերի 9–ի եռակողմ հայտարարության կոպտագույն խախտում է։ Այդպիսով Ադրբեջանը ցույց է տալիս էթնիկ զտումներ անելու և հայերի ցեղասպանություն իրականացնելու իր մտադրությունները։ Սա նաև ցույց է տալիս, որ Ադրբեջանը խնդիր է դրել դուրս բերել ռուս խաղաղապահներին Արցախից և նոր պատերազմ սկսել Հայաստանի դեմ։
Նման սադրանքների պատճառները պետք է փնտրել նաև Երևանում, ավելի ստույգ՝ ՀՀ կառավարության շենքում։
Եթե Հայաստանի խորհրդարանական մեծամասնությունը, ՀՀ կառավարության ղեկավարից ստացած հրահանգով, հրաժարվում է «հանրապետություն» բառից ու առաջարկում է ի պատասխան Ադրբեջանի խորհրդարանի մեր հայտարարության մեջ 44–օրյա պատերազմին վերաբերող հատվածում չօգտագործել «ռազմական ագրեսիա իր իսկ պատմական տարածքում ինքնորոշված Լեռնային Ղարաբաղի Հանրապետության» ձևակերպումն, այլ դրա փոխարեն գրել «հարձակում Լեռնային Ղարաբաղի հայության դեմ»,
եթե Հայաստանի խորհրդարանի մեծամասնությունը հրաժարվում է «Արցախի ժողովրդի ինքնորոշման իրավունքի իրացում» ձևակերպումից,
եթե Հայաստանի խորհրդարանի մեծամասնությունը հրաժարվում է Արցախի նկատմամբ իր հանձնառություններից,
եթե Հայաստանի խորհրդարանի մեծամասնությունը հրաժարվում է դատապարտել մեր դեմ ուղղված «Շուշիի հռչակագիրը»,
եթե Հայաստանի խորհրդարանի մեծամասնությունը հրաժարվում է «Արցախը չպետք է լինի Ադրբեջանի կազմում» ձևակերպումից,
եթե Պրահայում Նիկոլ Փաշինյանն ընդունել է, որ Ղարաբաղն Ադրբեջանինն է և Բաքուն պետք է շփվի ղարաբաղցիների հետ իր ներքին օրենսդրության շրջանակներում (Աստանայում արված Ալիևի այս հայտարարությունը Փաշինյանը լուռ համաձայնությամբ ընդունեց),
ապա բնական է, որ Ադրբեջանը դիմելու է սադրաքների ու փակելու է Լաչինի միջանցքը»:
