Ադրբեջանը, պատերազմի ժամանակ այդպես էլ չկարողանալով իր դրոշը ծածանել Ստեփանակերտում, հիմա ընդամենը ցանկանում է ավարտին հասցնել սկսած գործընթացը՝ Արցախի՝ հայկական մնացած հատվածը զրկելու տնտեսական ինքնուրույնությունից, Azg.am-ի թղթակցի հետ զրույցում կարծիք հայտնեց քաղտեխնոլոգ Արմեն Բադալյանը՝ անդրադառնալով Լաչինի միջանցքն ադրբեջանցիների կողմից այսօր փակելու միջադեպին։
«Հանքահումքային ռեսուրսները դեռևս հանդիսանում են Արցախի համար եկամուտ և անկախ ֆինանասավորում ապահովող գործոններ, և այժմ Ադրբեջանն Արցախին փորձում է զրկել այդ գործոններից։ Իսկ դրանցից զրկել կարող է մի դեպքում, երբ հանքահումքային ռեսուրսները վերցնի Արցախի ձեռքից և տա ցանկացած ուրիշին՝ թուրքական, իրանական, ռուսական կամ անգլիական ընկերության։
Ինչպես գիտենք, Ադրբեջանն Արցախում՝ հայկական ուժերի վերահսկողության տակ գտնվող 3 հանքի լիցենզիա արդեն իսկ տվել է անգլիացիներին։ Բնական է, որ սա դուր չի գալիս արցախահայերին, որոնք օրեր առաջ մի խումբ ադրբեջանցիների թույլ չէին տվել մուտք գործել Մարտակերտի շրջանի Կաշենի հանքավայր։
Այժմ ադրբեջանցիները երկրորդ քայլ են անում՝ իրենց հերթին կրկին փակելով, ավելին՝ վրաններ տեղադրելով Ստեփանակերտ-Գորիս ճանապարհին։ Սա նշանակում է, որ գործընթացը երկարատև է լինելու՝ հասնելով ճակատագրական հանգրվանի»,- ասաց Արմեն Բադալյանը։
Քաղտեխնոլոգի խոսքով՝ եթե Արցախ ելքումուտքը փակվում է, բնականաբար փակվում է նաև դեպի Արցախ սնունդ և առաջին անհրաժեշտության իրեր հասցնելու մուտքը, ինչն արդեն Ադրբեջանի կողմից ցեղասպան ակտ է և մեծ աղետի է հանգեցնելու։
«Այսինքն՝ իր այս քաղաքականությամբ Ադրբեջանը ցանկանում է ճնշում գործադրել, հասնել իր նպատակին՝ այն է՝ Արցախին զրկել տնտեսական ինքնուրույնությունից և վերջնականապես ոչնչացնել հայկական Արցախը։ Նրանք բացահայտ իրագործում են իրենց քաղաքականությունը՝ օգտվելով այն հանգամանքից, որ ՀՀ իշխանությունները ձեռքերը լվացել են Արցախից և բացի խոսքերից և որոշակի ֆինանսական օգնություն շպրտելուց՝ ոչ մի այլ բան չի անում»,- ամփոփեց քաղտեխնոլոգը։
Նշենք, որ այսօր համացանցում տարածված տեսանյութից պարզ է դառնում՝ ադրբեջանական լրատվամիջոցների մի խումբ ներկայացուցիչներ, ակտիվիստներ, բլոգերներ և հասարակական կազմակերպությունների անդամներ այս պահին շարունակում են փակ պահել Լաչինի միջանցքը։
Նրանք հարձակվում են ռուս խաղաղպահների վրա՝ այսպիսով բախում հրահրելով։
Ադրբեջանցի իբր բնապահպաններն, իրենց հերթին, ի նշան բողոքի՝ վրաններ են տեղադրել Գորիս-Ստեփանակերտ ճանապարհին։
