«Միասնության թևեր»-ը ԱԺ ընտրություններին ադրբեջանական միջամտության մասին տեղեկությունները կուղարկի ԵՄ-ին

ԱԺ ընտրություններին ադրբեջանական միջամտության մասին տեղեկությունները մենք կուղարկենք ԵՄ-ին․ այսօր տեղի է ունեցել իմ և Լիպարիտ Դրմեյանի հանդիպումը Հայաստանում ԵՄ պատվիրակությունում. հայտնում են «Միասնության թևեր» կուսակցությունից։

*Քննարկվող հիմնական հարցը, որ մենք բարձրացրել էինք, կապված էր հունիսի 7-ին Հայաստանի խորհրդարանական ընտրություններին Ադրբեջանից եկող արտաքին միջամտության հետ, որը, մեր համոզմամբ, անմիջական սպառնալիք է Հայաստանի ժողովրդավարությանն ու ընտրողների անվտանգությանը։

*ԵՄ պատվիրակությանը ներկայացրել ենք ապացույցներ, որոնք հաստատում են ադրբեջանական ագրեսիվ հռետորաբանությունը, որը վերաբերում է Հայաստանի դեմ պատերազմ սկսելու, Հայաստանից նոր տարածքային պահանջներ ներկայացնելու ու մի շարք այլ սպառնալիքների, եթե Նիկոլ Փաշինյանն ու ՔՊ կուսակցությունը չվերընտրվեն։

* Նշել ենք նաև, որ Նիկոլ Փաշինյանն ինքն ադրբեջանական սպառնալիքները դարձրել է ՀՀ ընտրություններում գործոն և օգտագործում է ՀՀ ընդդիմության ու ընտրողների դեմ։

* Հայաստանում ԵՄ պատվիրակությունում հանդիպումը կայացել է այն բանից հետո, երբ ես նամակով դիմեցի Հայաստանում ԵՄ դեսպանին՝ առաջարկելով Հայաստանում ընտրությունների գործընթացի վրա ռուսական ազդեցությանը հակազդելու կարևոր հանձնառության հետ միասին հակազդել նաև Ադրբեջանից սպառնալիքներին՝ ներկայացնելով կոնկրետ փաստեր։ Նամակում շեշտել էի, որ ընտրություններին արտաքին միջամտության դեմ հանձնառությունը չի կարող լինել ընտրովի՝ կախված նրանից, թե որտեղից կամ որ երկրից է գալիս։

* Հայաստանի ժողովրդավարական դիմակայունության աջակցելուն ուղղված Եվրախորհրդարանի 2026թ․ ապրիլի 24-ի բանաձևում և դրա հիման վրա Եվրոպական խորհրդին ու Եվրոպական հանձնաժողովին ուղղված միջնորդության մեջ նշվում է ռուսական միջամտությանը հակազդելու մասին։ Ըստ այդմ, եթե ԵՄ-ն ռուսական միջամտության դեմ միջոցներ է ձեռնարկում, ուրեմն նույնը պետք է անի նաև ադրբեջանական միջամտության դեմ։

* Համոզված եմ, որ ժողովրդավարության կանոնների ու արժեքների պաշտպանության հարցում հետևողականությունը՝ անկախ նրանից, թե որ արտաքին դերակատարն է միջամտում, սկզբունքային կարևորություն ունի ժողովրդավարական ինստիտուտների վստահելիության պահպանման և հայ ընտրողների իրավունքների պաշտպանության հարցում։

* Կարևոր եմ համարում ԵՄ պատվիրակությունում հավաստիացումը, որ ԵՄ-ն ուշադրության ներքո է պահում արտաքին միջամտության բոլոր փորձերը՝ դրանք բացահայտելու և հակազդելու համար՝ անկախ նրանից, թե որ երկրից են գալիս։

* Հանդիպմանը նշել ենք նաև, որ մենք հետևում ենք ՀՀ-ում հունիսի 7-ի ընտրություններին արտաքին միջամտության մասին հրապարակումներին։

* Իմ առաջարկի հիման վրա պայմանավորվածություն է ձեռք բերվել, որ ադրբեջանական միջամտության մասին հրապարակումներն ու ադրբեջանական աղբյուրներից այլ տվյալները մենք կուղարկենք ԵՄ-ին՝ դրանք ստուգելու և հակազդելու հարցի հետ կապված։ Սա համարում ենք կարևոր։

* Հայաստանյան հասարակությանը տեղեկացնում ենք, որ հետևողական ենք լինելու, որպեսզի Հայաստանի ժողովրդավարությունն ու ՀՀ քաղաքացին լինեն պաշտպանված և Հայաստանում լինի իշխանություն, որը չունի արտաքին կախվածություններ և ծառայում է միայն մեր ազգային շահերին։

* Մենք կարևորում ենք ԵՄ գործունեությունը Հայաստանում, մեր երկրի հետ հարաբերությունների խորացումը ու մասնավորապես՝ մեր դիմումները քննարկման արժանացնելու այս հանձնառությունը։