Ես շատ կցանկանայի, որ Երևանի Կոմիտասի անվան պետական կոնսերվատորիան մնար իր տեղում, որովհետև Երևանի կենտրոնում ձևավորված մշակութային միջավայրը անասելի գեղեցիկ է։ Azg.am-ի թղթակցի հետ զրույցում այս տեսակետը հայտնեց կոմպոզիտոր Արա Գևորգյանը՝ անդրադառնալով Կոնսերվատորիայի դասախոսների, ուսումնաօժանդակ և վարչական կազմերի անդամների, ուսանողների և շրջանավարտների համատեղ դիմում-պահանջին՝ ուղղված ԿԳՄՍՆ-ին՝ Կոնսերվատորիան պահել մայրաքաղաքի կենտրոնում, այն այլ բուհի հետ չմիավորվել և Ակադեմիական քաղաք չտեղափոխել։
«Դասական երաժշտության ձայնը, վոկալիստների պարապմունքները, որ լսվում են Կոնսերվատորիայի շենքից, հաճույք են պատճառում։ Ես այդ շենքի կողքով անցնելիս ուղղակի հաճույք եմ ստանում։ Շատ ուրախ եմ, որ այդ ձայները լսվում են մեր քաղաքում։ Օրինակ՝ նման բան շատ երկրներում չկա, և ես ինձ շատ լավ եմ զգում, որ մեր քաղաքի կենտրոնում կա դասական երաժշտության ձայնը. երգիչը փորձ է անում։ Հենց այդ պարապմունքն ինձ շատ հաճելի է։ Այդպես ավելի քաղաքակիրթ երկրի տպավորություն ենք թողնում, որ մեր քաղաքում նման գեղեցիկ ձայներ կան»,- ասաց Արա Գևորգյանը։
Կոմպոզիտորը միաժամանակ նշեց, որ Կոնսերվատորիան այլ բուհի հետ միավորելու, Ակադեմիական քաղաք տեղափոխելու մասին խորքային պատկերացումներ չունի և մանրամասների չի տիրապետում։
«Միավորումների մանրամասնությունների մեջ չեմ խորացել, չգիտեմ՝ որ բուհի հետ են միավորում, ինչն ինչի հետ են միավորում. այդ ինֆորմացիային չեմ տիրապետում։ Բուհերի միավորումը մասնագիտական շատ նեղ շրջանակներում երևի քննարկված հարց է, որի մեջ ես չեմ կարող խառնվել։ Բայց կրկնում եմ՝ ինձ համար շատ հաճելի է, որ Կոնսերվատորիան մայրաքաղաքի կենտրոնում լինի։ Հնարավոր է՝ մյուս բուհերն այլ վայր տեղափոխելն իմաստ ունի, բայց Կոնսերվատորիան շատ ցայտուն է, և իրենից դուրս եկած ձայները, որ լսվում են քաղաքի կենտրոնում, անգամ զբոսաշրջիկներին են հաճելիորեն զարմացնում։ Իմ անձնական ցանկությունն է, որ գոնե միայն Կոնսերվատորիան (մնացած բուհերի մասին ոչինչ չունեմ ասելու) մնա Երևանի կենտրոնում։ Դասական վոկալի, շեփորի ձայներն ինձ դուր են գալիս, շատ հաճելի է քաղաքի կենտրոնում այդ տեսակ ձայների հնչողությունը։ Մեր երկրում մեծ դիսբալանս կա. մեքենաներից ինչ երաժշտություն ասես՝ չի լսվում, իսկ ես կցանկանայի, որ մայրաքաղաքի կենտրոնում հնչեին հենց Կոնսերվատորիայի պատերից դուրս եկող ձայները։ Դրանք Երևանի կենտրոնին շատ են սազում»,- նշեց Արա Գևորգյանը։
Հիշեցնենք, որ նախօրեին Երևանի Կոմիտասի անվան պետական կոնսերվատորիայի ներկայացուցիչները նախարարությանը դիմում-պահանջ էին ներկայացրել՝ ՀՀ միակ երաժշտական բուհը չներառել «Ակադեմիական քաղաք» նախագծում, պահպանել բուհի կարգավիճակը և ինքնավարությունը՝ իր ներկայիս պատմական շենքում։
Այս նպատակով նախաձեռնված ստորագրահավաքին միացել են ՀՀ քաղաքացիներ և սփյուռքահայեր, այդ թվում նաև՝ առցանց ձևաչափով։ Ստորագրահավաքը սկսվել է ս/թ մարտի 13-ին և ավարտվել մարտի 25-ին։ Առկա է 6290 վավեր ստորագրություն։
