ՖԲ օգտատեր Ներսես Ներսիսյանի գրառումը, –
Հնարավոր «ցավոտ» զիջումներից առաջ սարսափի մթնոլորտ և նոր զոհերի սպառնալիք ստեղծելով՝ դավադիր իշխանությունը փորձում է սանձել բոլոր սպասելի ընդվզումները։ Երեք նոր զոհ՝ բանակցություններից առաջ… Իսկ հպատակներին Փաշինյանը համոզում էր, որ շրջել է պատերազմի էջն ու պետք է պատրաստվել խաղաղության։ Նիկոլիզմի ագիտպրոպը տարիներ շարունակ բոլոր հարթակներից քարոզում էր, որ չլինի Արցախ, չի լինի ո՛չ պատերազմ, ոչ էլ զոհ…
Բայց տղաները շարունակում են գերևարվել կամ սպանվել՝ զրկված ինքնապաշտպանվելու հնարավորությունից։
Թեև սահմանին, բայց սահմանը պաշտպանելու համար չէ, որ նրանք զոհվել են։ Նրանք սպանվե՛լ են, որովհետև Նիկոլին նոր զոհեր են պետք՝ իր հերթական զիջումները «հանուն հազարների փրկության» մատուցելու համար։ Սա ոչ այլ ինչ է, քան շանտաժ՝ սեփական հպատակների հանդեպ, ովքեր երեք տարի է գտնվում են պատանդի կարգավիճակում…
Նիկոլ Փաշինյանի կառավարման ամեն օրը հղի է նոր և անդառնալի կորուստներով, իսկ այն ծրագիրը, որն իրականացվում է նրա ձեռքով՝ անշրջելի կդարձնի մեր պարտությունը՝ զրկելով ոչ միայն կորցրածը վերականգնելու հնարավորությունից, այլև պետականությունից, արժանապատվությունից և ապագայից։
Հայրենիքի ամեն մի մետրի համար կռված, արյուն տված հայը բթացած հետևում է, թե ինչպես է կործանվում իր հայրենիքը, ինչպես են սպանում իր եղբայրներին, որպեսզի ինքն ավելի բթանա, ու ավելի հանձնվի «նիկոլներին»՝ դառնալով նրանց կողմից ստեղծվելիք «Էրմենիստան» վիլայեթի հնազանդ, բայց «հպարտ» գյավուրը։
Գիշերային արյունոտ աղջամուղջը կարծես չի վերջանում, խաչերը գերեզմաններ են դարձել, իսկ կարմիր կիսալուսինը բանտել է մեր ազատությունը։ Ամոթից ու կորստից կարկամած հայը թաքուն սեղմում է բռունցքները, դեմքը ջղաձգվում է, խուլ լսվում է ատամների կռճտոցը…
Երբեմնի շեն ու հզոր մեր հայրենիքում մի ուրվական է շրջում՝ Վրեժի ուրվականը…
