Երբեմն Փաշինյան Նիկոլն այնպիսի մտքեր է արտահայտում, որոնց հետ դժվար է չհամաձայնել: Օրինակ` «կաթողիկոսը կուսակրոն չէ»: Է հա, այն, որ կաթողիկոսը դուստր ունի, հայ հասարակության լայն զանգվածները գիտեին դեռ 20-25 տարի առաջ: Իհարկե, վարդապետության տեսանկյունից դա անթույլատրելի է, սակայն …
Անթույլատրելի է նաև գրագողությունը: Մանավանդ, որ ենթադրյալ գրագողը զբաղեցնում է Մայր բուհի ղեկավարի պաշտոնը: Այնպես, ինչպես կաթողիկոսի դստեր պարագայում, Փաշինյան Նիկոլը չէր կարող չիմանալ քննարկվող գրագողության փաստի մասին, քանզի այն լայնորեն լուսաբանվել է մամուլում և քննարկվել վարչական ու դատական կարգով: Ավելին` ենթադրյալ գրագողությունը կատարվել է Փաշինյան Նիկոլի սիրած աստվածաբանության ոլորտում: Բացի դրանից` ողջամիտ կասկածներ կան, որ գրագողությունը կատարվել է հենց օրվա իշխանության ցուցումով, որպեսզի գրագողը շուտափույթ կերպով դառնա գիտությունների դոկտոր և համապատասխանի պաշտոնին:
Ուրեմն, ի՞նչ է ստացվում: Ստացվում է, որ կաթողիկոսին դուստր ունենալ չի կարելի, սակայն կրթության ոլորտի ղեկավարին կարելի գրագող լինել:
Կարծում եմ` երկուսն էլ անթույլատրելի է և հավասարաչափ վնասաբեր: Սակայն, Փաշինյան Նիկոլը կենտրոնացել է բացառապես կաթողիկոսի և վերջինիս դստեր վրա:
Այսպիսով, Փաշինյան Նիկոլը խորամանկում է: Նա մի կողմից դատապարտում է գործած մեղքը, մյուս կողմից` հավանության է արժանացնում մեկ այլ մեղք: Եվ ո՞վ ասաց, որ Աստծո առջև կուսակրոնություն չպահպանելը գրագողությունից ավելի ծանր հետևանքներ ունեցող մեղք է:
Իրավապաշտպան Կարեն Հեքիմյան
