Քաղաքային տրանսպորտում նորամուծությունների ֆոնին նկատվում է մի օրինաչափություն, որը բավականին խոր արմատներով կապված է ազգի ներանձնային շփման մշակույթի հետ։
Վճարման տերմինալներով անհաջող վճարում կատարող ուղևորին սկսում են բոլորը հետևել, որպեսզի և ոչ մեկը անվճար չօգտվի հանրային տրանսպորտից։ Առավել անհաջողակներին և պարզապես վճարումից խուսափողներին սպասում է խուլ ու համընդհանուր պարսավանքը։
Սա նշանակում է՝ մեր քաղաքացին պահանջատեր է սոցիալական հարցերում և չի հանդուրժում որևէ կամայական կամ ոչ օրինական մոտեցում։
Այս իմաստով, սակայն, կա մի բայց։ Որքանո՞վ են հիմնավորված 2025 թվականի հունվարի 1-ից սպասվող և ազդարարված թանկացումները, ըստ որոնց՝ ուղեվարձը կազմելու է 300 դրամ։
Կա՞ արդյոք մեկ անձի փոխադրման ինքնարժեքի ուսումնասիրություն կամ անկախ աուդիտ փորձաքննություն:
Կարծում եմ՝ «ասեք, կանենք» գոռոցներով մայրաքաղաքի օդը տատանողներն առնվազն պետք է հետաձգեն ուղեվարձի թանկացումը և հրավիրեն անկախ աուդիտ։
Հատկապես խորհրդանշական է այն փաստը, որ ընտրություններից առաջ «ասենք, կանենք» ճչացողների մի խումբ ներկայումս կալանավորված է բազմաթիվ յուրացումների և այլ հանցագործ արարքների հոդվածներով։
Հարգելի երևանցիներ, պատրաստվե՛ք պաշտպանելու ձեր շահերը, ավել մի՛ վճարեք տրանսպորտի համար։
Իմիջիայլոց, Երևանի քաղաքապետարանում տրանսպորտի ուղեվարձի փոփոխությունները համակարգել և համակարգում է մի երիտասարդ չինովնիկ, որը ոչ մի օր չի աշխատել տրանսպորտային համակարգում և չունի մասնագիտական համապատասխան որակներ։
«Հայաքվե» նախաձեռնության ներկայացուցիչ, տնտեսագետ Հրայր Կամենդատյան
