Միջազգայնագետ, էներգետիկ աշխարհաքաղաքականության հարցերով մասնագետ Արմեն Մանվելյանը չի կարծում, որ Ռուսաստանից Հայաստան մտնող գազի ծավալների ժամանակավոր կրճատումը պատժամիջոց է. ըստ նրա՝ պատժամիջոցների համար պատճառներ են անհրաժեշտ։
«Գազամատակարարման ոլորտում տեխնիկական պատճառներ շատ են լինում։ Օրինակ՝ տարիներ առաջ վրացական ուղղությամբ խողովակաշարում մի քանի անգամ խնդիրներ էին առաջացել, և գազամատակարարումը երկար ժամանակով դադարեցվել էր։ Այսինքն՝ կարող են տեխնիկական պատճառներ լինել. չեմ կարծում, որ այստեղ քաղաքական դրդապատճառներ կան» ,- Azg.am-ի թղթակցի հետ զրույցում ասաց մեր զրուցակիցը՝ անդրադառնալով փետրվարի 17-ից ՀՀ ներկրվող բնական գազի օրական ծավալների ընդհատման և մի շարք ԱԳԼՃԿ-ների գազամատակարարման դադարեցման թեմային։
Արմեն Մանվելյանի խոսքով՝ Հայաստանի նկատմամբ հնարավոր պատժամիջոց կիրառելիս Ռուսաստանն ավելի շուտ և ավելի հեշտ կերպով կդիմի գազի գնի բարձրացմանը, այլ ոչ՝ ծավալների՝ մի քանի օրով ընդհատմանը։
«Մանավանդ այժմ գազի համաշխարհային գները շատ բարձր են։ Հայաստանը Ռուսաստանից գազ գնում է 178 դոլարով. սա Եվրոպայում ամենացածր գներից մեկն է։ Հայաստանից ավելի ցածր գնով գազ ռուսները վաճառում են բելառուսներին։ 1000 խ/մ գազի դիմաց 178 դոլար գինը նաև տարածաշրջանում ամենաէժան գինն է։ Օրինակի համար՝ Ադրբեջանը Թուրքիային գազ վաճառում է մոտավորապես 290 դոլարով»,- նշեց մասնագետը։
Արմեն Մանվելյանը միաժամանակ նկատեց՝ արդեն հաջորդ տարվանից ռուսական գազի գինը կթանկա։
«Արդեն այս տարվա վերջի գազի գները հավանաբար կփոխվեն։ Հայաստանի հետ գազային պայմանագրի ժամկետը վերջանում է. Գազպրոմի հետ մենք երկարաժամկետ պայմանագիր չունենք։ Եթե այս տարվա գինը ֆիքսված է, ապա հաջորդ տարվանը ֆիքսված չէ, դրա համար, կարծում եմ, հաջորդ տարվանից գինը կփոխվի»,- նշեց փորձագետը։
Անդրադառնալով ռուսական գազի այլընտրանքի թեմային՝ Արմեն Մանվելյանը հիշեցրեց՝ Հայաստանը գազային խողովակաշար ունի նաև հարևան Իրանի հետ, որով հնարավոր է լիովին բավարարել մեր երկրի կարիքները։
«Սակայն խնդիրն այն է, որ իրանական գազը բավականին թանկ է։ Ռուսական գազի հիմնական առավելությունը, բացի որակից, էժան գինն է»,- ամփոփեց մեր զրուցակիցը։
Հիշեցնենք, որ փետրվարի 14-ին մասնակի խցափակվել էր Վրաստանը և Հայաստանը սնուցող «Հյուսիսային Կովկաս–Անդրկովկաս» տարանցիկ մայրուղային գազատարը, որի պատճառով զգալիորեն նվազել էին ՀՀ ներկրվող բնական գազի օրական ծավալները: ՀՀ ներկրվող բնական գազի օրական ծավալների ընդհատումների պատճառով մեկ-երկու օրով ընդհատվել էր մի շարք ԱԳԼՃԿ-ների գազամատակարարումը։
Այսօր արդեն «Գազպրոմ Արմենիա» ՓԲԸ-ից տեղեկացրել են, որ փետրվարի 20-ին՝ ժամը 08։00-ից, ՀՀ տարածքում գործող ԱԳԼՃԿ-ների գազամատակարարումը ամբողջությամբ վերականգնված է:
Ներկայումս հանրապետության բոլոր սպառողների գազամատակարարումն իրականացվում է անխափան և ամբողջական ծավալով՝ ՌԴ-ից ներկրվող բնական գազի ծավալների և Աբովյանի գազի ստորգետնյա պահեստ կայանի պաշարների հաշվին։
