Վերջերս տեղի ունեցավ «Օգտագործված կամ անցանկալի կարգավորվող նյութերի տվյալների գույքագրման նախապատրաստում» եւ «Էներգա-արդյունավետության լրացուցիչ միջոցառումներ սառնամատակարարման ոլորտում» փոքրածավալ ծրագրերի շահագրգիռ կողմերի հանդիպում-քննարկումը:
Հանդիպմանը մասնակցում էին ՄԱԿ-ի շրջակա միջավայրի ծրագրի (UNEP) օզոնային ցանցի տարածաշրջանային համակարգող Հ. Քյոփենը, Տարածքային կառավարման եւ ենթակառուցվածքների, Շրջակա միջավայրի նախարարությունների, Պետական եկամուտների կոմիտեի, Ստանդարտացման եւ չափագիտության ազգային մարմնի ներկայացուցիչները, Երեւանի եւ Արմավիրի պետական տարածաշրջանային քոլեջների «Սառնարանային տնտեսություն» մասնագիտության դասախոսները, ՍՕՋԻ հայկական ասոցիացիայի անդամները, «Վեգա Ուորլդ» ՍՊԸ ներկայացուցիչը եւ «Օզոնային շերտի պահպանություն» ծրագրի փորձագետները:
Հ. Քյոփենը ներկայացրեց վերը նշված ծրագրերը՝ շեշտելով մեր երկրի կողմից Մոնրեալի արձանագրությամբ ստանձնած պարտավորությունների կատարման կարեւորությունը: Հանդիպման խոսնակները անդրադարձան Հայաստանում թափոնների կառավարման քաղաքականությանը, ոլորտի իրավակարգավորումներին, դրանց վերամշակման կենտրոններին եւ Հայաստանում առկա տեխնոլոգիական պոտենցիալին, երկրի լաբորատոր հզորություններին, տվյալների հավաքագրման մեթոդոլոգիային, օգտագործման ոչ ենթակա սառնագենտների ոչնչացման հնարավոր եղանակներին: Ներկայացվեց նաեւ Հայաստանում իրականացվող քաղաքականությունը՝ ուղղված էներգաարդյունավետությանը:
Տողերիս հեղինակը հակիրճ ներկայացրեց Հայաստանի էներգետիկ մարտահրավերները, հնարավոր լուծման եղանակները:
Մասնակիցներին ներկայացվեցին նաեւ «Վեգա Ուորլդ» ՍՊԸ-ի հետ համագործակցությամբ իրականացվող սպառողների վարքագծի ուսումնասիրության նպատակով իրականացվող հարցման առաջին փուլի արդյունքները:
Շահագրգիռ կողմերի հետ հաջորդ հանդիպումը տեղի կունենա 2025 թ.ին:
ՍՏԵՓԱՆ ՊԱՊԻԿՅԱՆ
Հայկական էներգետիկական ակադեմիայի հիմնադիր նախագահ
