Արթնացում. վերադարձ այն տեղին ու ժամանակին, ուր հնչել են ազատության երգեր, ուր հնչում են այսօր «Երեւանյան էտյուդները» Օհան Դուրյանի ղեկավարությամբ:
Երեւան. Ազատության հրապարակ: Ճարտարապետ Ալեքսանդր Թամանյանի ստեղծագործական միտքը կերտեց մշակութային օջախ Օպերայի եւ բալետի ազգային ակադեմիական թատրոն եւ ֆիլհարմոնիկ համերգասրահ, որոնք հայտնի են այսօր Ալեքսանդր Սպենդիարյանի եւ Արամ Խաչատրյանի անուններով:
Ազատության հրապարակ, ուր Հովհաննես Թումանյանի անմահ խոսքն է՝
…Իմ նո՛ր հայրենիք, հզո՛ր հայրենիք:
Քանդակագործ Գետիկ Բաղդասարյանի կերտած Օհան Դուրյանի կիսանդրին տեղադրվեց Ալեքսանդր Սպենդիարյանի շիրմի հարեւանությամբ, հնչեց «Երեւանյան էտյուդները». եւ՛ հնչելու է հանճարեղ ստեղծագործությունը այս հրապարակում, եւ՛ համախմբելու է մեզ՝ որպես միասնական ժողովուրդ: Գիտակցելու՝ մեղեդին ներդաշնակ է ժամանակի ելքին, եւ մարդկային կյանքն է օրհներգությամբ հուշում՝ բոլոր ճամփաները դեպի ելք են տանում, օրը լուսանում է սերունդների կանչով…
-Հոգին կարողություն է էությանդ մեջ, երբ արարվում է քանդակ, պոեզիա, երաժշտություն: Օհան Դուրյանը կրքոտ, խանդավառ, ուժեղ անհատն է իր մեկնաբանած կոմպոզիտորների կողքին: Նրա կիսանդրին քանդակելիս մաեստրոյի ոգին եւ էությունը նյութականանում էր, կյանք էր առնում ազնիվ մեր կերպն ու կերպարը,- զրույցի ժամանակ ասաց Գետիկ Բաղդասարյանը:
… Երկիր Նաիրի. մաեստրոյի վերադարձով՝ դեպի հոգու խոյանք եւ Ազատության հրապարակ.
-Ուր մենք կանք մեր արած սխալներով եւ չարված գործերով,- իր խոսքն ամփոփեց Գետիկ Բաղդասարյանը:
Օհան Դուրյանի դիրիժորական հզոր արվեստով նոր ու նորովի նշանակությամբ պիտի հնչի մեր մեջ Ալեքսանդր Սպենդիարյանի երաժշտությունը: Ճարտարապետ Սահակ Սաֆարյանի, շինարարներ Սամվել Ղումաշյանի, Արսեն Պետրոսյանի համերաշխ աշխատատարությունը եւ մաեստրոյի արվեստի երկրպագուներից Վահան Վարդապետյանի տեսլականն ու կամքը մեզ օրինակ են իմաստնության, որ մշակութային նվաճումները խաղաղության եւ Երկիր կառուցելու գրավականն են:
ՄԱՆԻԿ ԱՃԵՄՅԱՆ
