«Ռուսաստանի կոնյակի շուկան հեղեղված է կեղծ եւ խարդախված արտադրանքով»,- այդ երկրում Կոնյակ, սպիրտ եւ ալկոհոլային արտադրանք թողարկողների միության նախագահ եւ Պետդումայի պատգամավոր Վլադիսլավ Ռեզնիկի այս հայտարարությանն են անդրադարձել ռուսական որոշ լրատվամիջոցներ:
Ասվում է, թե Դաշնային մաքսային ծառայության տվյալներով՝ մանրածախ առեւտրում առկա կոնյակի 60-70%-ը կեղծված է: Հայաստանից առեւտրի ցանցեր են հասնում տեխնոլոգիական պահանջների խախտմամբ պատրաստված փոխարինիչներ՝ որակյալ ալկոհոլային խմիչքի արժեքից ցածր գներով:
Ռեզնիկը նշել է, որ իսկական կոնյակի արտադրությունը պահանջում է բարդ եւ երկարատեւ տեխնոլոգիական գործընթաց, որը բացառում է ցածր գնի հնարավորությունը: Անբարեխիղճ վաճառողները, հակառակը, ամեն ինչ անում են արտադրական ծախսերը կրճատելու համար: Ընդսմին, Ռեզնիկի խոսքերով, Հայաստանում բավականաչափ խաղողի այգիներ չկան՝ կոնյակի թորվածքի անհրաժեշտ ծավալներն արտադրելու եւ հայտարարագրված մատակարարման պահանջները բավարարելու համար:
«Հայկական կոնյակը երկար պատմություն ունեցող առանձնահատուկ ապրանքանիշ է, որը ծանոթ է Խորհրդային Միությունում մեծացած յուրաքանչյուրին: Ցավոք, այսօր պետստանդարտի չափանիշներին չհամապատասխանող կեղծված արտադրանքի մատակարարները ակտիվորեն շահագործում են դա… Խաղողը ակնհայտորեն վրացական է, եւ շատ դեպքերում այն «նոսրացվում» է Հայաստանում եւ ուղարկվում Ռուսաստան որպես ցածրորակ ապրանք»,- ասել է Ռեզնիկը «Ուռա.ռու»-ի թղթակցին:
Անշուշտ սա լուրջ մեղադրանք է՝ ավանդաբար մեր հպարտություններից մեկը համարված հայկական կոնյակի վարկին հարվածող: Պարզվում է՝ այսպիսի մեղադրանք Ռուսաստանից հնչում է ոչ առաջին անգամ եւ նույնիսկ ոչ առաջին տարին: Այդպիսիք եղել են ե՛ւ 2018-ին, ե՛ւ 2024-ին, ե՛ւ անցյալ տարի… Երեւի մնում է պարզել՝ սա սոսկ քաղաքակա՞ն դրդապատճառներով թելադրված հայտարություններից է, որպիսիք սովորաբար պատահում են որեւէ երկրի իշխանությանը «դաս տալու» համար, թե՞ իրականություն է: Առաջին դեպքում, թվում է, անհրաժեշտ է, որ Հայաստանից համապատասխան պաշտոնական պատասխան հնչի: Իսկ եթե ճիշտ է, ակնհայտորեն պետք է լուրջ միջոցներ ձեռք առնվեն՝ մեր փառաբանված ապրանքանիշի վարկի վերջնական անկում թույլ չտալու համար:
Կարծում ենք՝ խոսքը պատկան պետական կառույցներինն է:
ԳԵՂԱՄ ՄԿՐՏՉՅԱՆ
