Ապրիլի 3-ից 12-ը Հենրիկ Իգիթյանի անվան գեղագիտության ազգային կենտրոնում կայացավ Նվարդ Հայթայանի «Չորս արեւ» ցուցահանդեսը, որտեղ ցուցադրված էին արվեստագետի վերջին շրջանի գործերը:
Մտնելով սրահ՝ այցելուն միանգամից շրջապատվում է վառ ու խոսուն գույներով, ինչը ձմեռվա գունային պասիվ ներկապնակից հետո նոր շունչ է հաղորդում արվեստասեր աշխարհին: Շարքը, որը ստեղծվել է արվեստագետի խորհրդածումների, ընդվզումների ու ներքին ապրումների հետեւանքով, խոսում է նրա ներքին ուժի մասին, որն անգամ վերջին տարիների անձնական ու ազգային փորձություններից հետո կարողանում է հանրությանը փոխանցել լուսավորն ու դրականը:
Նվարդ Հայթայանն իր հարուստ ներկապնակի շնորհիվ ներկայացնում է Հայաստանի գեղեցիկ բնությունը՝ նոր ու թերեւս չտեսնված գույներով: Արվեստագետի «Իմ անուշ հայրենիք» շարքը դրա վառ ապացույցն է: Այս բնապատկերներն արվեստագետի ու բնության միջեւ մի ինքնատիպ երկխոսություն են, որտեղ Հայաստանի տարբեր վայրերի վառ տեսարանները մենք տեսնում ենք արվեստագետի աչքերով: Ուշագրավ է, որ որոշ աշխատանքներ գորգեր են հիշեցնում, ինչը խոսում է մեր բնաշխարհի բազմազանության ու նկարչուհու կողմից դրա ընկալման շնորհի մասին:
Նվարդ Հայթայանի գործերում հեռանկարային շերտադրումները համաչափ ու գրագետ են արված: Յուրաքանչյուր գիծ, յուրաքանչյուր գունային շերտ նպաստում է աշխատանքների համաչափությանն ու դիտորդի կողմից դրանց ընկալմանը: Հատվող հեռանկարները շարունակում են իրար եւ ամբողջացնում հորինվածքը: Արվեստագետի բազում գունախաղերն օժանդակում են աշխատանքների ամբողջականությանն ու դիտորդին ներդաշնակություն փոխանցում:
Հիրավի, Նվարդ Հայթայանի աշխատանքները շոյում են աչքդ ու հոգիդ ջերմությամբ լցնում:
ՀՐԱՉՅԱ ԳԱԼՍՏՅԱՆ
