Անցյալ տարի լրացավ Նյու Յորքում հրատարակվող «Սանսթորմ կերպարվեստի հանդեսի» («SunStorm Fine Art Magazine») 50-ամյակը: Այն 1975-ին հիմնել են Վիկտոր եւ Ջեյմի Ֆորբսները: Հանդեսը նվիրված է դասական եւ ժամանակակից արվեստին՝ հրապարակելով հոդվածներ, հարցազրույցներ եւ ներկայացնելով թե՛ ճանաչված, թե՛ նոր արվեստագետների աշխատանքները: Ժամանակի ընթացքում ամսագիրը դարձել է միջազգային հարթակ՝ տարածվելով տասնյակ երկրներում եւ ծառայելով որպես արվեստագետների ներկայացման ու խթանման կարեւոր միջոց:
Հանդեսի կեսդարյա հոբելյանի առթիվ հրատարակվել է հատուկ թողարկում, որտեղ 22 էջ նվիրված է հայ մշակույթին: Շապիկին Լիբանանում, Հայաստանում եւ Կանադայում բնակվող արվեստաբան, Բեյրութի «Նոյյան տապան» պատկերասրահի հիմնադիր տնօրեն, «Սանսթորմ կերպարվեստի հանդեսի» մնայուն աշխատակից Մովսես Հերկելյանի (Մովսես Ծիրանի) լուսանկարն է կինոդերասանուհի եւ նկարչուհի Ջեյն Սեյմուրի հետ միասին: Ներկայացված են Մովսես Ծիրանիի հոդվածները հայաստանաբնակ նկարիչ Գեւորգ Եղիազարյանի («Հավերժական կյանքի էության արձագանքները»), կանադաբնակ արվեստագետ Պերճ Չաքըճյանի («Բնության հեշտանքը որպես արվեստի բերկրանքի բեղմնավորություն») եւ «Հիլոզոիստը (Արշիլ Գորկու 120-ամյակի առթիվ») հոդվածները՝ առատ պատկերազարդումներով: Հանդեսում տեղ է գտել նաեւ Մովսես Հերկելյանի՝ 1979 թվականին Արշիլ Գորկու քրոջ՝ Սաթենիկ Ադոյանի հետ վարած հարցազրույցը, որն անգլերեն հրատարակվում է առաջին անգամ:
Հանդեսի հայկական բաժինն ավարտվում է խմբագիր Վիկտոր Ֆորբսի՝ «Նոյյան տապանի» հիմնադրման 30-ամյակի առթիվ Մովսես Հերկելյանի հետ վարած հարցազրույցով («Նոյյան տապանը» որպես արվեստի տաճար»), դարձյալ մի շարք լուսանկարներով, որոնցում երեւում են ոչ միայն Մովսես Հերկելյանը, այլեւ կինը եւ որդին՝ «Նոյյան տապանի» իր գործակիցներ Էլո եւ Հերակ Հերկելյանները:
Ավելացնենք նաեւ, որ այս տարի լույս է տեսել նույն «Սանսթորմ կերպարվեստի հանդեսի» ոսկե հոբելյանի ավելի ծավալուն թողարկումը, որի շապիկին, ի թիվս այլոց, տեղ է գտել նաեւ Մովսես Հերկելյանի անունը:
Հիրավի, բացառիկ երեւույթ՝ միջազգային հեղինակավոր հարթակում հայ արվեստն ու արվեստագետներին լայնորեն իրազեկելու:
Ա. Բ.
