STARMUS միջազգային փառատոնը կապված է Ստիվեն Հոկինգի, Բրայան Մեյի եւ աշխարհահռչակ այլ անունների հետ: Այն 2011թ. անցկացվել է Թեներիֆե կղզում (Կանարյան կղզիներ,Իսպանիա), հետագայում նաեւ Նորվեգիայում, Շվեյցարիայում: Փառատոնը միավորում է գիտությունը, կրթությունը, արվեստն ու տեխնոլոգիաները եւ նպատակ ունի հանրայնացնելու գիտությունը մարդկության համար՝ արվեստի միջոցով:
2022թ. սեպտեմբերի 5-ից 10-ը փառատոնն անցկացվելու է Հայաստանում` հնարավորություն տալով տեղի բնակչությանը վայելելու գիտության եւ արվեստի օրերը: Այն առիթ կտա օտարերկրացիներին այցելելու Հայաստան եւ ծանոթանալու նաեւ Հայաստանի գիտական եւ մշակույթային ժառանգությանը: Միջոցառումներին Հայաստանում մասնակցելու են շուրջ 5 տասնյակ աշխարհահռչակ գիտնականներ, ինժեներներ եւ տիեզերագնացներ, երաժշտության եւ արվեստի համաշխարհային աստղեր: Այդ թվում` Նոբելյան մրցանակակիրներ, համաշխարհային ճանաչում ունեցող գիտնականներ, երաժշտության եւ արվեստի աստղեր, տեխնոլոգիական ոլորտի ականավոր ներկայացուցիչներ:
Փառատոնի շրջանակներում անցկացվող միջոցառումները լինելու են տարբեր եւ ընդգրկելու են դասախոսություններ ու համերգներ, գիտական ճամբարներ, «կլոր սեղաններ»: Նպատակն է հանրայնացնել գիտությունը եւ հասանելի դարձնել լայն շրջանակների համար, հատկապես ուսանողների եւ երիտասարդների:
Նորվեգիայում անցկացված փառատոնի ընթացքում 2017թ. Սթարմուսի ճամբարն ունեցել է ավելի քան 45 հազար այցելու,իսկ 2022թ. Հայաստանում ակնկալվում է ունենալ ավելի քան 100 հազար: Նախորդ փառատոնները հյուրընկալել են 25 Նոբելյան մրցանակակիրներ:
Հայաստանում գիտության եւ արվեստի փառատոնը անց է կացվելու «STARMUS VI. 50 տարի Մարսի վրա» խորագրով եւ նվիրված է լինելու Մարսի վրա «Մարս 3» տիեզերակայանի առաջին փափուկ վայրէջքի 50-ամյակին:
Ստեփան ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
