Հայաստանի էներգետիկայի զարգացման գործում կարեւոր նշանակություն ունի Հայկական ատոմակայանի հուսալի եւ կայուն աշխատանքը:
Հարկ է նշել, որ ՀԱԷԿ-ի թիվ 2 էներգաբլոկի շահագործման ժամկետի երկարացման ծրագրի շրջանակներում ընթացք է տրվել նոր ԲԲՍ-110/220կՎ (բաց բաշխիչ սարքեր) կառուցման գործընթացին: Նախագիծն իրականացվում է ՀՀ կառավարության կողմից հատկացված ֆինանսական միջոցներով: Նպատակը Հայկական ատոմակայանի աշխատանքի հուսալիության բարձրացումն է: Աշխատանքներն իրականացնելու են «Կասկադ Էներգո» ՍՊԸ-ի մասնագետները: Նախատեսվում է այն շահագործման հանձնել 2025թ. մայիսին:
Ներկայում աշխատանքներ են կատարվում շինհրապարակի կահավորման, անհրաժեշտ տեխնիկայի տեղակայման, ինչպես նաեւ մատակարարումների կազմակերպման ուղղությամբ:
Վերջերս փորձագիտական առաքելություն անցկացնելու նպատակով ՀԱԷԿ-ում էին չեխական UJV REZ, a.s. ընկերության մասնագետները: Առաքելության նպատակն էր աջակցել Հայկական ԱԷԿ-ի շահագործման վթարային ռեժիմներում շրջակա միջավայրի խիստ պայմանների համար սարքավորումների ատեստավորման ծրագրի իրականացմանը: Ելնելով առաքելության արդյունքներից՝ կայանին կփոխանցվի սարքավորումների ատեստավորման վերաբերյալ չեխական ընկերության ունեցած տվյալները: Հետագայում նախատեսվում է նաեւ տեխնիկական աջակցություն տրամադրել սարքավորումների ատեստավորման ծրագրի միջոցառումների իրականացման հարցում:
Անհրաժեշտ է նշել,որ 2022թվականին ատոմակայանի կողմից արտադրվել է 2.63 միլիարդ ԿՎտժ էլեկտրական էներգիա, իսկ 2023թ.հունվար ամսին` ավելի քան 328 միլիոն ԿՎտժ: Միջին ամսական էլեկտրական բեռնվածքը կազմել է 424.6 ՄՎտ: Շատ լավ ցուցանիշ է:
ՍՏԵՓԱՆ ՊԱՊԻԿՅԱՆ
