Տեղի ունեցավ «Ագապի» գրքի շնորհանդեսը եւ ֆիլմի քննարկումը: Սցենարիստ Անահիտ Մխիթարյանի եւ պրոդյուսեր Ելենա Արշակյանի համատեղ աշխատանքի շնորհիվ Հովսեփ Վարդանյանի (Վարդան փաշա) վեպի հիման վրա հեռուստաէկրաններին բարձրացավ «Ագապի» ֆիլմը: Գրքի ստացած մեծ արձագանքները եւ ֆիլմի կարճ ժամանակում սիրված լինելը պատճառ դարձան այդ վեպի նորացված տարբերակի հրատարակման համար: Տեղի ունեցավ հանդիպում-քննարկում բազմասերիանոց ֆիլմի թիմի հետ:
Ելենա Արշակյանը եւ Անահիտ Մխիթարյանը մտածել են, որ այդ վեպը կարդալով կարելի է բազմասերիանոց ֆիլմ նկարահանել:
Սցենարիաստ Անահիտ Մխիթարյանը խոսեց ֆիլմեր ստեղծելու ժամանակ ուրիշ երկրների մշակությներին անդրադառնալու իրենց սկզբունքի մասին եւ ասաց, որ «Ագապի» ֆիլմը եւս բացառություն չէր, քանի որ ֆիլմում կան դրվագներ, որոնք նկարահանվել են Հունաստանում:
Ֆիլմն իր սյուժեով վեպին համապատասխան չէ, ֆիլմում ներկայացվում է մեր ժամանակակից իրականությունը, չնայած որոշ չափով պահվել է վեպի գաղափարախոսությունը:
«Հերոսուհին` Ագապին, համեստ, իր ժամանակաշրջանին եւ բարքերին բնորոշ աղջնակ է, ում կոտրելը բավականին հեշտ է: Կերպարը ֆիլմում փոխվել է, փորձել ենք բնավորության գծերի մեջ ավելացնել ըմբոստություն, ստեղծել այնպիսի կերպար, որը կարող է երբեմն հակառակվել»,- նշեց հեռուստաֆիլմի սցենարիստը:
«Ագապի» վեպը, ոըր համարվում է արեւմտահայ առաջին գործը, մի անմեղ սիրո պատմություն է, որի գլխավոր հերոսուհին՝ Ագապին, հարում է հայ լուսավորչական դավանանքին, իսկ նրան համակրող երիտասարդը՝ կաթոլիկ: Դավանանքների այդ անտագոնիզմում երիտասարդ աղջկա` Ագապիի եւ նրա սիրեցյալի` Հակոբի սիրո պատմությունը վերածվում է ողբերգության:
Գլխավոր հերոսուհու կերպարը մարմնավորում էր Իննա Խոջամիրյանը, որ նշեց, թե հեռուստասերիալի սիրված լինելը եւ գրքի հանդեպ մարդկանց հետաքրքասիրությունը զգացել է առաջին իսկ օրերից:
«Ես երջանիկ եմ, որ թեկուզ համացանցային տիրույթում ունեմ ընթերցասեր զանգված, որն ինձ հետ հավասար ավարտին է հասցնում բոլոր գրքերը, «Ագապի»-ն եւս բացառություն չէր: Աշխարհին հաղթելու համար մենք ոչինչ չունենք, մեր միակ զենքը դա գիրքն է եւ մեր գիտելիքը. Շատ կարդացեք եւ ինքներդ ձեր վրա կզգաք աշխարհայացքի փոփոխությունը եւ աշխարհին ձեր պիտանի լինելը»,- ասաց Իննա Խոջամիրյանը:
«Մենք քիչ ժամանակ ունեինք գրքի պատմությանը ծանոթանալու համար, մեծ դժվարությամբ է հայտնվել այն մեր ձեռքերում, խնամքով ընթերցել, եւ նորից վերադարձրել ենք. Մեզ համար սա փոքր, բայց շոշափելի հաղթանակ է, տեսնելով երիտասարդության այսչափ դրական արձագանքը: Հեռուստաֆիլմի միջոցով հանրությանը փորձում ենք փոխանցել վեպի հիմքում ընկած մեծ գաղափարախոսությունը եւ, իհարկե, ներկայացնել գրողի`Հովսեփ Վարդանյանի վեպը, որը կարծում եմ այս հանդիպումից հետո շատերը կընթերցեն»,- իր հերթին նշեց պրոդյուսեր Ելենա Արշակյանը:
ՆԱՐԵ ԽԱՆԱՂՅԱՆ
ՀՊՄՀ Լրագրության 2-րդ կուրսի ուսանողուհի
