Լույսի օրրան, հավատի կենտրոն հորջորջված Երուսաղեմը համարվում է համաշխարհային երեք մոնոթեիստական կրոնների` քրիստոնեության, մահմեդականության եւ հուդայականության սրբավայրը, բայց քաղաքը միայն այդ կրոնների հետեւորդներին չի պատկանում: Այն պատկանում է ամբողջ աշխարհին: Դրա վառ ապացույցն են հազարավոր զբոսաշրջիկները, որոնք հատկապես կրոնական պաշտոնական արարողությունների անցկացման օրերին ամեն տարի այցելում են այդ քաղաքը, եւ հազարավոր գրքերն, որոնք գրվել են գովերգելու նրա լուսավոր ու հոգեւոր գեղեցկությունը եւ պատմական նշանակությունն ու դերը համաշխարհային պատմության մեջ:
Այժմ այդ սուրբ քաղաքին նվիրված «The Cobblestones of Jerusalem» վերնագրով անգլերեն լեզվով մի նոր գիրք է գրել Երուսաղեմում ծնված, «Ազգ»ի ընթերցողներին քաջածանոթ, վետերան լրագրող Արթուր Հակոբյանը: Գիրքը, ըստ «Միրոր-Սփեքթեյթր» շաբաթաթերթի, խորամուխ է լինում քաղաքի պատմամշակութային, սոցիալ-տնտեսական խրթին լաբիրինթոսի ոլորանների մեջ եւ ընթերցողին ներկայացնում հաղթանակների եւ պարտությունների հետաքրքրական դրվագներ: Սալաքարերով պատված ճանապարհների յուրաքանչյուր սալիկ ունի իր ուրույն պատմությունը` հիմնված քրիստոնյաների (հայեր, ղպտիներ, հույներ, եթովպացիներ), մահմեդականների եւ հրեաների տարեգրությունների վրա: Դարերի ընթացքում անթիվ պատերազմներ մղվել եւ հազարավոր մարդիկ են սպանվել, սակայն արյան եւ արցունքի օրհասական պահերից հետո արեւը դարձյալ սկսել է շողալ այդ քաղաքի վրա: Հայկական համայնք գոյություն է ունեցել այնտեղ անհիշելի ժամանակներից: Հայերն են այնտեղ հիմնել առաջին տպարանն ու լուսանկարչական ստուդիան: Նրա ճանապարհներով մարգարեներ են ճեմել եւ խաղաղություն ու բարություն քարոզել:
«Amazon» հրատարակչատան լույս ընծայած այս հատորը երկար սպասված ներդրում է` նվիրված այդ քաղաքի պատմությանը:
