Պահպանելով հայ երգարվեստի ավանդույթները.

Այս տարի Ֆլորա Մարտիոսրանը կդառնար 65 տարեկան

ԳԱՐԻԿ ԱՎԵՏԻՍՅԱՆ

Այսօրվա հեռուստաալիքները ողողված են մեծ մասամբ ոչ հետաքրքրական եւ անիմաստ հեռուստահաղորդումներով եւ անորակ նախագծերով, որոնք հիմնականում ապականում են մեր երիտասարդությանը` մղելով դեպի հեռավոր անդունդ։

Ներկա ակնարկը նվիրվում է երգչուհի, Հայաստանի Հանրապետության  ժողովրդական արտիստ, Կոմիտասի անվան միջազգային երաժշտական դպրոցի հիմնադիր, «Artists for Peace» բարեգործական կազմակերպության հիմնադիր, «Never Again» մշակութային շարժման նախաձեռնող Ֆլորա Մարտիրոսյանին ու նրա վառ հիշատակին: Սիրված արվեստագետն իր երգարվեստով գերել է ինչպես հայազգի, այնպես էլ օտարազգի հանդիսատեսին: Նա ծնվել է 1957 թվականի փետրվարի 5-ին Գյումրիում։ Նրա հայրը մարզիկ էր, մայրը՝ տնային տնտեսուհի։ Ընտանիքում չորս երեխա էին՝ երկու տղա, երկու աղջիկ։ Ֆլորան ամենափոքր երեխան էր։ Վոկալ տվյալները ժառանգել է մորից։ Ավարտել է Գյումրու Արմեն Տիգրանյանի անվան երաժշտական դպրոցը։ Այնուհետեւ ավարտել է Երեւանի պետական կոնսերվատորիան։ 1973 թվականին նա մասնակցում է «Գարուն 73» երգի մրցույթին եւ արժանանում առաջին մրցանակին։ 1987 թվականին ամուսնանում է լրագրող Հրահատ Գեւորգյանի հետ։ 1991 թվականին նա ընտանիքով տեղափոխվում է ԱՄՆ՝ Լոս Անջելես։ 1997 թվականին նրանք վերադառնում են Երեւան։ 1997-2001 թվականներին գլխավորում է Արմեն Տիգրանյանի անվան երաժշտական դպրոցը։ 2001 թվականին ամուսնու հետ կապված Ֆլորա Մարտիրոսյանը տեղափոխվում է Լոս Անջելես։ 2002 թվականին Ֆլորա Մարտիրոսյանը Միացյալ Նահանգներում հիմնում է Կոմիտասի անվան երաժշտական ակադեմիա։2007 թվականին հիմնում է “Artists for Peace” բարեգործական հիմնադրամը, որի կազմում ընդգրկվել են աշխարհահռչակ երգիչներ, հոլիվուդյան գերաստղեր, իրենց ձայնը բարձրացնելու ընդդեմ ցեղասպանությունների, “Այլեւս երբեք” կարգախոսով։2011 թվականի սեպտեմբերին ՀՀ Նախագահի հրամանագրով շնորհվել է Հայաստանի Հանրապետության ժողովրդական արտիստի պատվավոր կոչում։

2011 թվականի նոյեմբերի 1-ին, Լոս Անջելեսի Գիբսոն համերգասրահում տեղի ունեցավ առաջին համերգը, որին մասնակցում էին Սթիվի Ուոնդերը, Չակա-Կանը, Էրիկ Բենեթը, Բոբի Բրաունը եւ շատ ուրիշներ։Մահացել է 2012 թվականի նոյեմբերի 20-ին Լոս-Անջելեսում՝ լեղապարկի վիրահատությունից հետո առաջացած բարդությունների պատճառով։

Ցավոք, նա շուրջ 10 տարի արդեն մեզ հետ չէ, սակայն իսկական հայրենասերներն ու արվեստասեր հասարակությունը տարբեր առիթներով  մշտապես հիշում է նրա գեղեցիկ կատարումները՝դրանք փոխանցելով երիտասարդներին ու բոլոր նրանց, ովքեր ի զորու են պահպանել հայկական մշակույթն ինչպես Հայաստանում, այնպես էլ դրա սահմաններից դուրս: