Հայաստանի ֆուտբոլի ֆոդերացիայի հիմնադրման 30-ամյակին նվիրված միջոցառումների շարքում Աբովյան քաղաքում հանդիսավոր կերպով վերաբացվեց «Քաղաքային» մարզադաշտը։ Վերանորոգված մարզադաշտը կարող է տեղավորել 3100 հանդիսական և ընդունել ինչպես տեղական, այնպես էլ միջազգային հանդիպումներ։
Առաջիկայում սպասվում է նաև Վանաձորի քաղաքային մարզադաշտի բացումը։
Աբովյանի Քաղաքային մարզադաշտում նորոգվել է ամեն ինչ՝ սկսած լուսավորության համակարգերից, վերջացրած հանդերձարաններով, տանիքով։ Հիմնանորոգվել է նաև խաղադաշտը, որն այժմ շատ բարձր որակի է։
Աբովյանի քաղաքային մարզադաշտը բացվել է 1966 թ. և նախատեսված է եղել տեղավորելու 5500 հանդիսական։ Մինչև 2006 թ., այն հայտնի էր որպես «Կոտայք» մարզադաշտ։ Թիմը լուծարվելուց հետո` 2006 թ., մարզադաշտը ստացավ իր ներկայի անունը։
Անհրաժեշտ է նշել, որ ՖԻՖԱ-ն հրապարակել է ազգային հավաքականների թարմացված վարկանիշային աղյուսակը։ Հայաստանի ազգային հավաքականը պահպանել է դիրքերը և զբաղեցնում է 92-րդ հորիզոնականը։ Առաջին հորիզոնականը զբաղեցնում է Բրազիլիան։
Ստեփան ՊԱՊԻԿՅԱՆ
