«Եռամիասնություն հանուն զարգացման» հ/կ-ի (Հայաստան, Արցախ, Սփյուռք) նախաձեռնած ամենամյա 12-րդ մրցանակաբաշխությունը հիշատակի ու հարգանքի միջոցառում ասես լիներ: Անցնող տարվա ընթացքում «Հայրենիքի նվիրյալ» գրությամբ շնորհակալագրերին արժանացածների առաջին շարքերում 44-օրյա պատերազմի զոհվածների հարազատներն ու վիրավորված անձինք էին: Միջոցառման մեկնարկային հատվածը խոնարհումի, մեծարման, կատարած սխրանքների ու հանուն հայրենիքի կյանքը նվիրած հայորդիների անձնվեր պատմությունների մասին էր: Անդադար, չլռող ու հոտնկայս ծափահարությունների ներքո հետմահու մրցանակի արժանացան որդեկորույս մայրերն ու ոտքը, ձեռքը կորցրած կամ սահմռկեցուցիչ պատերազմի հետեւանքով մարմնական տարբեր աստիճանի վիրավորված տղաները:
Առաջին խոսքը հոգեւորականինն էրՙ օրհնությամբ ու իր բարեմաղթանքով հանդես եկավ արժանապատիվ Տեր Զգոն քահանա Աբրահամյանը, այնուհետեւ բեմ բարձրացավ մրցանակաբաշխության հիմնադիր «Եռամիասնություն հանուն զարգացման» հ/կ նախագահ Մամիկոն Խուրշուդյանը եւ Ապրիլյան պատերազմի հերոս Ադամ Սահակյանի մորՙ Գայանե Անտոնյանի հետ միասին հայտարարեցին «Տարվա Սխրանք» անվանակարգի մրցանակակիրների անունները:
Այս անվանակարգում հետմահու մրցանակների արժանացան 44-օրյա պատերազմի հերոսներ Մարտական Խաչ 1-ին աստիճանի շքանշանակիր, Արիության մեդալակիր, կրտսեր սերժանտ Խաչիկ Պողոսյանը , Մարտական ծառայության մեդալակիրներ Գեւորգ Խաչատրյանը , Ժորա Մարտիրոսյանը , Վարդան Միրզախանյանը , Արցախի Հանրապետության Արիության մեդալակիր, Մարտական ծառայության մեդալակիր, լեյտենանտ Վոլոդյա Մհերյանը , Արիության մեդալակիր, կրտսեր սերժանտ Վահե Եղիկյանը :
Միջոցառման կազմակերպիչ Մամիկոն Խուրշուդյանի ջանքերով, բացի պատերազմի հերոսներից, մեկտեղվել էին նաեւ մշակույթի, սպորտի, ուժային կառույցների, բժկության, լրագրության, քաղաքական դաշտի եւ սփյուռքի ներկայացուցիչները:
«Սփյուռքի լավագույն խմբագիր» անվանակարգում մրցանակի արժանացավ ՌԱԿ Լիբանանի «Զարթօնք» օրաթերթի գլխավոր խմբագիր Սեւակ Հակոբյանը :
«Տարվա լավագույն լրագրող» անվանակարգում մրցանակի արժանացավ «Ազգ»ի լրագրող Սեւակ Վարդումյանը ՙ 44-օրյա պատերազմում կատարած աշխատանքի համար, որի ընթացքում, հիշեցնենք, նա վերք էր ստացել արկի բեկորից:
Այլ անվանակարգերում մրցանակներ ստացան Հայաստանի ազատագրության հայ գաղտնի բանակի մարտիկ, «Վան» գործողության ղեկավար Վազգեն Սիսլյանը , պարուսույց Սոֆի Դեւոյանը , երաժիշտ, երգահան Արա Գեւորգյանը , երգչուհի Ալլա Լեւոնյանը , երգչուհի Նունե Եսայանը , բեմադրիչ, ֆիլմարտադրիչ Հրաչ Քեշիշյանը , դուդուկահար Կամո Սեյրանյանը, ըմբշամարտիկ Արսեն Հարությունյանը , կարատեիստ Կամո Ունանյանը , քաղաքական գործիչներ Թեհմինե Վարդանյանը եւ Դավիթ Խաժակյանը , ԱԺ պատգամավոր Աննա Գրիգորյանը , քաղաքապետական եւ համայնքային գործերի հմուտ գործիչներ Կամո Արեյանը եւ Դավիթ Կարապետյանը :
Շնորհավորում ենք բոլորին:
