Գրում է ամերիկյան հանրահայտ եւ հեղինակավոր «Foreign Policy»-ի հանդեսը
Օրերս Թուրքիայի քաղաքական եւ հասարակական շրջանակները նորից սկսել են քննարկել նախագահ Ռեջեփ Թայիփ Էրդողանի առողջական վիճակը:Այս հարցը, իհարկե, նոր չէ, երկրում դեռեւս քննարկվել էր 2014-ից առաջ, երբ Էրդողանը վարչապետ էր: Առհասարակ ժողովրդավարական երկրներում պետության կամ կառավարության ղեկավարի առողջության խնդիրներին լուրջ են վերաբերում, պարտադիր տեղեկացնելով բնակչությանը նրանց ինքնազգացողության մասին: Թուրքիայում էրդողանի վատառողջության մասին, սակայն, իմացել էին Թուրքիայի Ազգային մեծ ժողովի նիստերին վերջինի շուրջ մեկ ամիս բացակայությունից հետո միայն, այն էլ պատգամավորները:
Այնուհետեւ պարզվեց, որ նա քաղցկեղով հիվանդ է եղել եւ վիրահատվել էր հաստ աղիքից: Ապաքինվեց, դրանով դադարեցին Էրդողանի հիվանդության մասին ենթադրության բնույթի խոսակցություններ: Դրանք վերսկսեցին ընթացիկ տարա հուլիսին, երբ Էրդողանը հեռակապով, առցանց հուլիսի 21-ին «Ռամադանի» տոների առթիվ իր կուսակիցներին շնորհավորելիս, ուղիղ եթերում հանկարծ սառեց, հետո փակվեցին նրա աչքերը եւ նա 10-12 վարկյան դադարեց շարունակել շնորհավորական ելույթը:
«Odatv.com»-ի հուլիսի 22-ի վկայությամբ, Էրդողանի վատթարացման տեսանյութը հեռարձակել էր «Haber Turk» հեռուստատեսությունը, ինչի համար արժանացել նախագահականի հաղորդակցությունների վարչության պետիՙ Ֆահրեթդին Ալթունի եւ «Գորշ գայլերի» քաղաքական կազմակերպությանՙ Ազգայնական շարժում կուսակցության գլխավոր նախագահ Դեւլեթ Բահչելիի խիստ քննադատությանը:
Ալթունը, դատապարտելով հաղորդման առնչությամբ «Haber Turk»-ին, ասել էր. «Սուտ լուրերի, վատաբանումների եւ ապատեղեկատվության դեմ շարունակվում է մեր պայքարը, իսկ «Haber Turk»-ը չի հրաժարվում սյս վարվելակերպից: Մեր ժողովրդի իրազեկվածությունը ճշմարիտ լուրերով ապահովելը լրատվամիջոցների հեղինակության խնդիրն է, եւ մենք այդ ուղղությամբ ջանք չենք խնայելու»: Ի պատասխան «Haber Turk»-ի հաղորդավար Մեհմեդ Աքիֆ Էրսոյն էլ նույն օրը դատապարտել էլ Ալթունին, թե նախագահի հեղինակությունը համազոր է Թուրքիայի հեղինակությանը, եթե նա գերհոգնած վիճակում էր, ապա նրան պետք չէր ցուցադրել հեռուստատեսությամբ:
«Haber Turk» կայքէջի հեղինակ Ֆաթիհ Ալթայլին էլ միջադեպի առնչությամբ գրի էր առել մի հոդված, որտեղ մասնավորապես գրելՙ «Երկրի նախագահի նախորդ օրը իր կուսակիցներին հղած ուղերձի տեսանյութը լրատվամիջոցներին Անադոլու գործակալությունն է տրամադրել: Դա տեսագրել էր Թուրքական հանրային հեռուստատեսությունըՙ TRT-ն: Հեռուստատեսությունը նախագահի վատթարացման տեսարանները ջնջել էր տեսանյութից, ապա այն նոր տրամադրել լրատվամիջոցներին, բայց «Անադոլու» գործակալությունը նույնությամբ տեղադրեց կայքէջում, նույն կերպ վարվեցին նաեւ այն հեռուստատեսությունները, որոնք նլութը քաղել էին գործակալությունից: Այդ տեսանյութի հեռարձակումը կատարյալ խայտառակություն է, որովհետեւ դա դիտում են ոչ միայն Թուրքիայում, այլեւ ողջ աշխարհում: Ըստ երեւույթին ոմանք Էրդողանին բացահայտորեն ծանր կացության մեջ գցելու մտադրություն ունեն, որովհետեւ տեսանյութը պատրաստվել էր նախօրոք, այլ ոչ թե հեռարձակվել ուղիղ եթերում»:
Ալթայլու այս տողերին էլ բուռն հակազդեցությամբ արձագանքել է Բահչելիի խորհրդական Յըլդըրայ Չիչեքը , թե նա տառապում է ատելություն սերմանելու մոլուցքով, իսկ «Haber Turk» կայքէջը չափն անցնում է, մինչդեռ պետք է իմանար եւ զգուշացներ իր հեղինակին:
Ըստ երեւուկթին չեն իմացել, որ վերջերս թուրքական լրատվամիջոցները ընդդիմադիր Ժողովրդա-հանրապետական կուսակցության խոսափող «Ջումհուրիյեթ» թերթի գլխավորությամբ վերստին սկսեցին արծարծել Էրդողանի առողջության խնդիրները: Նրանց միացան համանուն քաղաքական գործիչները: Ինչ վերաբերում է շարքային քաղաքացիներին, ապա նրանց հավանաբար հետաքրքրում է ոչ այքան Էրդողանը, որքան անելանելի թշվառ վիճակը, որի մեջ հայտնվել են վերջինի բռնատիրության պատճառով: Թերեւա այդ առումով պատահական չեր «Գորշ գայլերի» երբեմնի խոսափող «Ենի չաղ»-ը, որ նախորդ օրը գրել էր. «Թուրքիայում 16 մլն. մարդ ապրում է սովի, իսկ 50 միլիոնը աղքատության շեմին»:
Ամենայն հավանականությամբ վերարծարծումների մեկնարկը «Էրդողանը հիվանդ է» հոդվածով տվել է ամերիկյան հեղինակավոր «Foreign Policy» հանդեսը, որը հոկտեմբերի 2-ին թարգմանաբար արտատպեց «Ջումհուրիյեթ» թերթը: Ըստ ամերիկյան հանդեսի, Էրդողանն այնքան է հիվանդ, որ նույնիսկ ի վիճակի չէ կատարել նախագահի պարտականությունները: Հանդեսը միաժամանակ կարծիք է հայտնել, որ Էրդողանը 2023-ին նախատեսվող հաջորդ ընտրությունների նախօրյակին կարող է հայտնվել անպաշտպան վիճակում եւ առողջական վիճակի վատթարացումը նրան հավանաբար կզրկի կրկին առաջադրվելու հնարավորությունից:
Այնուհետեւ «Foreign Policy»-ին շարունակել է. «Վերջին ամիսներին ի հայտ են եկել բազմաթիվ տեսանյութեր, որոնցում թուրք առաջնորդի ինքնազգացողությունն ամենեւին լավ չի երեւում: Որոշ տեսանյութեր թեեւ հստակ չեն, սակայն Էրդողանի վատառողջության մասին հարցականներ, այնուամենայնիվ, առաջացնում են: Օրինակՙ տեսանյութերից մեկում նա աստիճաններով բարձրանալիս իր տիկնոջ օգնության կարիքն է զգում, իսկ մյուսում Աթաթուրքի դամաբարան բարձրանալիս քարշ է տալիս ոտքերը»:
Լուսանկարը Odatv.com -ի
