«ՀՐԵԱԿԱՆ ԹԱԼԻԲԱՆԸ» ԱՊԱՍՏԱՆ Է ՀԱՅՑՈՒՄ ԻՐԱՆՈՒՄ

Եբրայերեն «մաքուր սիրտ» նշանակությամբ «Լեւ Թահոր» ծայրահեղ ուղղափառ հրեական աղանդը վերնագրային բնորոշումը ստացել է արտաքին նմանողությամբՙ կանայք պարտավոր են ոտքից գլուխ սեւ գլխանոցով թիկնոց հագնել, աղջիկները 20-ը չբոլորած պիտի ամուսնանան տարիքով մեծ փեսացուների հետ: Վերջին 30 տարում ո՛ր երկրում հայտնվում են աղանդի հետեւորդները, գրում է գերմանական «Զյուդդոյչե ցայթունգի» Թել Ավիվի թղթակիցը, աղմկահարույց պատմությունների առիթ են տալիս: Իսրայելում ձեւավորված 250 անդամներից բաղկացած աղանդը ԱՄՆ-ից Կանադա, ապա Գվատեմալա է հասել, իսկ այժմ նոր հասցեն է ուրվագծվումՙ Իրան: Վերջերս բացահայտվել է, որ 2018-ին արդեն «Լեւ Թահորը» պաշտոնապես դիմել է Իրանի իշխանություններին ապաստանի խնդրանքով, ինչը չի մերժվել: «Լեւ Թահորը» Իրանին սատարելու է «սիոնիստական գերիշխանությանը հակազդելու , սուրբ հողն ու հրեաներին խաղաղ ճանապարհով ազատագրելու հարցում»: Իսրայելում եւ ԱՄՆ-ում անհանգստացած են, որ Իրանում նրանք քաղաքական պատանդ կդառնան: