ԷԼԱԴԱ ՊԵՏՐՈՍՅԱՆ
Ծննդով Արցախից քամանչահարը հաճարենուց իր ձեռքով քամանչա է պատրաստել, որը հայկական ժողովրդական տեմբրից բացի ունի նաեւ դասական եւ աշխարհի այլ երկրներին բնորոշ տեմբր, մասնավորապես` բուլղարական, մոլդովական, ռումինական, հունական:
«Ես կարողացա պատրաստել այդ գործիքը եւ կարողացա նվագել Ռիմսկի Կորսակովի «Իշամեղվի թռիչքը», Վիվալդիի ստեղծագործությունները, որոնք միջազգային փառատոններում ինձ մեծ հաջողություններ բերեցին: Մինչեւ օրս նվագում եմ իմ պատրաստած գործիքով», – պատմում է Ալեքսանդր Մովսեսյանը:
Նա մշտապես ապացուցել է, որ քամանչան հայկական գործիք է: Քամանչայի ծագման, զարգացման, կատարողական արվեստի մասին աշխատություն է գրել եւ ներկայացրել Է համառուսաստանյան, համամիութենական եւ միջազգային կոնֆերանսներում: Սիրելով երաժշտական գործիքը եւ իր աշխատանքը` միշտ բարձր է պահել հայկականը եւ հայ տեսակը:
Ալեքսանդր Մովսեսյանը երաժշտական կրթություն ստացել է դեռեւս 8 տարեկանից: Նախ սովորել է ջութակ, ապա քամանչա, ոգեշնչման աղբյուր ունենալով Սայաթ-Նովային:
Ավարտել է Երեւանի Կոմիտասի անվան պետական կոնսերվատորիայի քամանչայի դասարանը: Սովորել Է նաեւ Երեւանի կոնսերվատորիայի ասպիրանտուրայում, ստանալով «Երաժշտագետ» եւ «Գործիքագետ» որակավորումները:
Որպես մենակատար աշխատել Է ԼՂ պետական էստրադային նվագախմբում, ինչպես նաեւ աշխատել է Հայաստանի ազգային նվագարանների պետական նվագախմբում` օրերս վախճանված Վլադիլեն Բալյանի ղեկավարությամբ:
Ընտանեկան հանգամանքներից ելնելով` 1984 թ-ին Ալեքսանդրը ընտանիքով տեղափոխվել է Ռուսաստան, սակայն շարունակել է քամանչան ներկայացնել ամեն տեղ:
Նա ոսկե մեդալով է պարգեւատրվել ՀՀ ԿԳՄՍ նախարարության կողմից հայ մշակույթին մատուցած ծառայության համար:
Ռուսաստանյան մի շարք փառատոնների դափնեկիր է:
ՌԴ նախագահի հրամանագրով պետությանը մատուցած ծառայությունների համար արժանացել է ՌԴ վաստակավոր գործչի կոչմանը:
Ալեքսանդր Մովսեսյանը գրանցվել է ՀՀ «Դյուցազնագրում»` հայ ազգային մշակույթը զարգացնելու, ինչպես նաեւ քամանչա երաժշտական գործիքն ըստ արժանվույն ներկայացնելու համար:
