Ազգային ժողովի խորհրդի արտահերթ նիստում քննարկվել է ԱԺ նախագահ Ալեն Սիմոնյանի եւ պատգամավոր Սիսակ Գաբրիելյանի հեղինակած ՀՀ Ազգային ժողովի խորհրդի 2017 թվականի դեկտեմբերի 27-իՙ «Հայաստանի Հանրապետության Ազգային ժողովում լրագրողների հավատարմագրման կարգը հաստատելու մասին» թիվ 044-Լ որոշմամբ հաստատված հավելվածում փոփոխություններ եվ լրացումներ կատարելու մասին» ԱԺ որոշման նախագիծը, որով լրագրողներն իրենց մասնագիտական գործունեությունը կիրականացնեն Ազգային ժողովի նստավայրում առանձնացված հատուկ տեղերումՙ նիստերի դահլիճի դիմաց գտնվող սրահում, օթյակում եւ Ազգային ժողովի այգում: Ազգային ժողովի պատգամավորների աշխատասենյակներում լրագրողնեը կարող են մասնագիտական գործունեություն իրականացնել միայն պատգամավորների համաձայնությամբ:
Մաշալլահ, դուք գերազանցեցիք բոլորին, ու անգամ ինքներդ ձեզ, քանի որ իշխանության գալիս դուք բոլորից շատ եք խոսել ժողովրդավարությունից, խոսքի ազատությունից, թափանցիկ կառավարումից եւ այդ կարգի այլ, ինչպես հետո պարզվեց, ձեզ համար անկարեւոր մանրուքներից:
Նախագիծն ընդունվեց, խորհրդի մեծամասնությունն իշխանությունից է: Անձամբ տողերիս հեղինակին ոչ լուսաբանման հին կարգն է խանգարել էթիկայի մեջ մնալ եւ ցանկացած թեման լուսաբանել, ոչ էլ նոր կարգը կխանգարի, ու ինքս էլ նկատել եմ լրագրողական անտակտության կենտ դրսեւորումներ, որոնք, սակայն, պիտի պատճառ չլինեին այս կարգի որոշման համար: Կարեւորն այստեղ սկզբունքն է, երբ խոսում են գանձից (ժողովրդավարությունից), բայց տանձ (սահմանափակում) են դեմ տալիս, ու լրագրողների աշխատանքի կանոնակարգման անվան տակ զսպաշապիկ են հագցնում լրագրողներինՙ պատգամավորին մի դաս բարձր կապույտ արյունավոր դասելով: Վիրավորական է:
