9 օգոստոս 2021թ.
Հայկական բարեգործական ընդհանուր միությունն իր շնորհավորանքներն է հայտնում Հայաստանի Հանրապետության վարչապետ Նիկոլ Փաշինյանին եւ իր թիմին նոր կառավարության ձեւավորման կապակցությամբ։ Սա ինքնին դրական ձեռքբերում էՙ հաշվի առնելով երկրի ներքաղաքական անկայունությունը եւ տարածաշրջանում առկա աշխարհաքաղաքական լրջագույն մարտահրավերները։
Հայկական սփյուռքը Հայաստանի ապագայով մտահոգ բարեկամ ժողովուրդների հետ միասին ողջունում է ընտրությունների միջոցով երկրում բնականոն կյանքի աստիճանական վերադարձը։ Սա կարեւոր նախապայման է հյուծիչ պատերազմից եւ ներքաղաքական լարվածությունից հետո վերականգնվելու եւ հարյուրավոր հայ ռազմագերիներին տուն վերադարձնելու աշխատանքները շարունակելու համար։
Թեեւ Հայաստանի ժողովուրդն իր քվեարկությամբ կողմ է արտահայտվել կայունությանը եւ խաղաղությանը, Հայաստանի նոր կառավարությունը ստիպված է լինելու առերեսվել հետպատերազմյան դժվարությունների ու ազգային անվտանգության սպառնալիքների հետՙ պայմանավորված Հարավային Կովկասի աշխարհաքաղաքական իրավիճակով։
Մենք հուսով ենք, որ այս պայմաններում ձայների մեծամասնությունը ստացած վարչապետն ու իր կառավարությունը վճռական կգտնվեն երկրի զարգացման ճանապարհին տեղական եւ միջազգային լավագույն մասնագետներին ընդգրկելու գործում։ Իրապես, այսօր Հայաստանի եւ Արցախի ինքնիշխանությունն ու անվտանգությունը մեծապես կախված են առաջիկա ամիսներին եւ տարիներին կայացրած կարճաժամկետ որոշումներից եւ երկարաժամկետ հանձնառությունից։
Այս առումով, Սփյուռքի համայնքների, քաղաքացիական հասարակության, եկեղեցու ու այլ կառույցների մասնակցությունը եւ համախմբումն ամուր հիմք կլինեն գալիք դրական փոփոխությունների համար։
Այս նպատակին հասնելու համար մենք ակնկալում ենք, որ Հայրենիք-Սփյուռք համագործակցության, համատեղ աշխատանքի եւ երկխոսության համար կստեղծվեն ավելի հստակ եւ անմիջական մեխանիզմներՙ հնարավորություն տալով օտար երկրներում ապրող Հայաստանի քաղաքացիներին նշանակվել պետական բարձր պաշտոններում (ինչը ենթակա է խորհրդարանի հաստատմանը)։ Օրինակՙ Հայաստանում մեկ տարվա մշտական բնակությունը կարող է նվազագույն անհրաժեշտ շեմ լինել պետական պաշտոններում նրանց նշանակման համար։
Ցավալիորեն, այսօր Հայաստանը բախվել է մոտալուտ ժողովրդագրական աղետի։ 44-օրյա պատերազմը եւ արտագաղթի ահագնացող տեմպերը եւս մեկ հարված էին մեր Հայրենիքի ժողովրդագրական վատթար վիճակին, ինչի հաղթահարման համար անհրաժեշտ են համապարփակ քայլերՙ ապահովելու Հայաստանի ժողովրդագրական կենսունակությունը։
Այսօր, առավել քան երբեւէ, Հայաստանը պետք է հավատարիմ մնա ժողովրդավարական չափանիշներին եւ մարդու իրավունքների պաշտպանությանը, ապահովի դատական համակարգի անաչառությունը, պաշտպանի սեփականության իրավունքն ու իրականացնի թափանցիկ ու ազատ տնտեսական քաղաքականություն։
Միեւնույն ժամանակ, հարկավոր է ներդնել ավելի արդյունավետ կարգավորումներ տնտեսության մեջՙ հակազդելու ազգային անվտանգության այն սպառնալիքներին, որոնք սերում են ներկայիս տնտեսական վարչարարությունից։ Առաջին քայլերից կարող է լինել քաղաքացիություն չունեցող անձանց կողմից հողի սեփականության իրավունքի սահմանափակումները։
Մենք նաեւ հուսով ենք, որ Հայաստանը կշարունակի իրականցնել հայկական քաղաքակրթության պահպանման սրբազան առաքելությունըՙ զուգահեռ պաշտպանելով ու զարգացնելով հայկական ինքնության հիմնասյուներըՙ լեզուն, մշակույթը, կրթությունը եւ եկեղեցին։
ՀԲԸՄ-ն պատրաստ է իր ողջ կարողությունները ծառայեցնել այս նպատակներին հասնելու համար։ Մենք կշարունակենք մեր առաքելությունըՙ օգնելով վերակառուցել ավելի անվտանգ եւ ծաղկուն ապագա։ Մենք շարունակում ենք հանձնառու մնալ հավաքագրելու ՀԲԸՄ աշխարհասփյուռ անդամներին եւ բոլոր հնարավորություններըՙ օգնելով իրացնելու այն ներուժը, որը առկա է յուրաքանչյուր հայ մարդու մեջՙ պետական ծառայողներից եւ գործարարներից մինչեւ երիտասարդներ եւ հասարակության այլ անդամներ։
