Եթե հարկ լիներ հունիսի 18-ին Իրանում կայանալիք նախագահական ընտրությունների առանձնահատկությունն ընդգծելու համար պերճախոս ձեւակերպում առաջարկել, այն պայմանականորեն կանվանեի «թյուրքախոս իրանցիների իրավունքների պաշտպանության մրցապայքար»: Պատճառը հետեւյալն է.
ԻԻՀ նախագահի յոթ թեկնածուներից չորսըՙ Էբրահիմ Ռեյիսին , Մոհսեն Ռեզային , Աբդոլնասեր Հեմմաթին ու Մոհսեն Մեհրալիզադեն , վերջին օրերի իրենց քարոզարշավը փորձում են կառուցել թյուրքախոս իրանցիների նկատմամբ ցուցաբերած կարեկցանքի մարտավարության վրա:
Օրինակ, նախընտրական հեռուստադեբատներից մեկի ժամանակ Մեհրալիզադեն մրցապայքարի մեջ մտնելու իր ակտիվությունը հիմնավորել է ընտրությունների նկատմամբ Իրանի ազերիների ցուցաբերած անտարբերության հանգամանքով, հավելելով, որ հենց այդ մտահոգությունից ելնելով էլ հայտնվել է մրցապայքարի մեջ: Եվ իր պնդումը վավերագրելու համար, թուրքերենով արտասանել է «Հեյդար-բաբա» կոչված հայտնի բանաստեղծությունից մի քանի տող: Նա նաեւ խորհուրդ է տվել «ադրբեջաներեն» եզրույթի փոխարեն օգտագործել «թուրքերեն» բառը: Ի դեպ, Մեհրալիզադեն իր համախոհներից մեկի անունը հնչեցնելով, նրան ներկայացրել է որպես «Իրանի թուրքական համայնքի նախընտրական շտաբի պետ»:
Հեռուստաբանավեճին հնչեցված Մեհրալիզադեի այս խոսքերին ոչ միայն չեն հակադարձել դեբատի մյուս մասնակիցները, այլեւ մեկը մյուսին հերթ չտալով հաստատել բանախոսի ասածները: Օրինակ, թեկնածուներից Էբրահիմ Ռեյիսին հաճոյախոսական ձեւակերպումներով հայտնել է, որ թուրքերն իր նկատմամբ հատուկ համակրանք ունեն, որի համար էլ հեռուստաամբիոնից իր երախտիքն է հայտնել նրանց:
Նախագահի մեկ այլ թեկնածու, թուրքական արմատներով համեդանցի Հեմմաթին, մյուսներից ետ չմնալու համար, աղավաղված թյուրքերենով արտասանել է «յաշասին» (Կեցցե) բառը:
Իսկ գրեթե բոլոր նախագահական ընտրություններին մասնակցության հայտ ներկայացրած Մոհսեն Ռեզային, գերազանցելով «յաշասին» կոչականն արտասանած մրցակցին, Իրան-Իրաք պատերազմի մասին ներկայացրած իր հերոսապատումը եզրափակել է «յաշասին Ազարբայջան» հուզական արտահայտությամբ:
