Երկօրյա այցով Հայաստանում է ՌԴ արտգործնախարար Սերգեյ Լավրովը , որը Երեւանից մեկնելու է Բաքու: Լավրովը հանդիպումներ է ունեցել վարչապետ Փաշինյանի եւ արտգործնախարար Արա Այվազյանի հետ: Նիկոլ Փաշինյանը հանդիպման ընթացքում խոսել է դժվար պահին Հայաստանին մեկնված ռուսական օգնության ձեռքիցՙ համավարակի եւ Ղարաբաղի դեմ ագրեսիայի հետեւանքով ստեղծված խնդիրները լուծելիս, ՌԴ շնորհիվ պատերազմական գործողությունների կանգնեցնելը նշելով, ռուս խաղաղապահների ներկայությունը Լեռնային Ղարաբաղի անվտանգության երաշխիք անվանելով եւ Վլադիմիր Պուտինը դերը խաղաղության ու խնդիրների լուծման ուղղությամբ առանձնահատուկ ընդգծելով:
Հայաստանն էլ պատրաստակամ է շարունակել 2020 թվականի նոյեբերի 9-ի եւ 2021 թվականի հունվարի 11-ի հայտարարություննեով նախատեսված պայմանավորվածությունների կատարումը: ԲայցեւՙՓաշինյանը նշել է, որՙ
Ադրբեջանի գործողությունները բոլորովին չեն նպաստում երկխոսության առաջընթացին, այն էՙ Ադրբեջանի կողմից ռազմագերիներին չվերադարձնելը, Հայաստանի նկատմամբ տարածքային նկրտումները, հայկական մշակութային եւ կրոնական ժառանգության ոչնչացումը, որոնք ուղղված են տարածաշրջանում իրավիճակի լարմանը եւ պայմանավորվածությունների տապալմանը: Նա Ադրբեջանի ապակառուցողական դիրքորոշման արձագանք է համարել Մինսկի խմբի համանախագահների վերջին հայտարարությունը, որը համահունչ է հայկական կողմի դիրքորոշմանը, այն էՙ վերականգնել Լեռնային Ղարաբաղի հակամարտության վերջնական կարգավորմանը հասնելու խաղաղ բանակցային գործընթացը: Ինչպես տեսաքՙ Արցախի հանրապետության մասին էլ ոչ ոք չի խոսումՙ Լեռնային Ղարաբաղ է:
Ավելի վաղ իր հայ գործընկերոջ հետ հանդիպումից հետո տեղի ունեցած ասուլիսում Սերգեյ Լավրովը նշել էր, թե քաղաքական հարցերը հեշտ կլուծվեն, երբ մարդիկ սկսեն լավ ապրել, սա որպես պատասխան հաղորդուղիների ապաշրջափակման հարցին.«Խաղաղ գործընթացը, որը սկսվել է նոյեմբերի 9-ից, նպատակ ուներ դադարեցնել պատերազմն ու անցնել խաղաղապահ օպերացիայի եւ բոլոր տնտեսական եւ տրանսպորտային հաղորդակցությունների ապաարգելափակմանը, արդեն գրեթե կես տարի էՙ իրականացվում է: Այդ պատճառով խոսել խաղաղ գործընթացի անցնելու մասինՙ իրականության խեղաթյուրում է: Երբ մարդիկ ազատվեն շրջափակումից ու էմբարգոյից, այդ ժամանակ կանցնեն այն առավելություններից օգուտ քաղելուն, որոնք ներկայացնում է այդ ե՛ւ ռազմավարական, ե՛ւ աշխարհաքաղաքական, ե՛ւ աշխարհատնտեսական առումով կարեւոր տարածաշրջանը: Մեր ջանքերով հրադադար սահմանվեց եւ խաղաղապահ զորախումբ տեղակայվեց, ինչի մասին պայմանավորվել էին Ռուսաստանի, Ադրբեջանի նախագահներն ու Հայաստանի վարչապետը: Եվ ես համոզված եմ, որ երբ մարդիկ սկսեն զգալ խաղաղ կյանքի օգուտները, նրանք կսկսեն արդեն այլ կերպ վերաբերվել հարցերին, որոնք այժմ մեր որոշ գործընկերներ փորձում են առաջին պլան մղել: Պետք չէ այժմ քաղաքականացնել գործընթացը: Այն բավական բարդ է: Նրանք, ովքեր փորձում են այդ հարցերը թողնել հետոյի եւ առաջին հերթին զբաղվել քաղաքական հարցերով, իմ կարծիքով, ամբողջ գործընթացը ոտքից գլուխ շրջում են: Ավելի հեշտ է լուծել քաղաքական հարցերը, երբ մարդիկ նորմալ են ապրում, հողի վրա, որտեղ ե՛ւ ադրբեջանցիները, ե՛ւ հայերը շատ տասնամյակներ եւ հարյուրամյակներ կողք կողքի ապրել են»,- ասել է նա:
Դեՙ ինքը, Լավրովն այս տարածաշրջանում եւ հայերի կաշվի մեջ չի ապրում, դրա համար էլ այդպես հեշտ է խոսում, առեւտրի վերածում մեր հողի վրա անվտանգ ապրելու մեր իրավունքը:
Իսկ թե ոնց է հարյուրամյակներ հաշվել հայ-ադրբեջանական հարաբերություններում Սերգեյ Լավրովը, երբ ադրբեջանական պետություն հասկացությունը ընդամենը 100 տարվա ծագումնաբանություն ունի, հասկանալի չէՙ կա՛մ հաշվել չգիտե, կա՛մ պատմություն:
